June 14, 2021

மீன் வயிற்றில் மனிதன் உயிருடன் இருக்க முடியுமா? - குர்ஆன் கற்றுத் தரும் அழகிய அறிவியல்.


 
திமிங்கிலத்தினால் விழுங்கப்பட்ட அமெரிக்காவை சேர்ந்த ஒருவர் உயிருடன் மீண்ட சம்பவம் தொடர்பில் ஊடகங்கள் செய்தி வெளியிட்டுள்ளன.


இந்நேரத்தில் இது தொடர்பான குர்ஆனிய வழிகாட்டல் பற்றி நாம் இந்நேரத்தில் புரிந்து கொள்ள வேண்டும்.

திருமறைக் குர்ஆன் 37:142, 21:87, 68:48 ஆகிய வசனங்களில் யூனுஸ் என்ற இறைத்தூதர் மீன் வயிற்றில் சிறை வைக்கப்பட்ட அழகிய அறிவியல்பூர்வமான ஒரு உண்மையை உலகத்தாருக்கு விபரிக்கிறது.

அமெரிக்கரான ஆய்வாளர் திமிங்கிலத்தினால் விழுங்கப்பட்டு உயிருடன் மீண்ட சம்பவத்துடன் குர்ஆனிய அறிவியலை நோக்கினால் அன்றும், இன்றும் என்றும் குர்ஆன் மட்டுமே அகிலத்தாருக்கு அழகிய வழிகாட்டி என்பதை உள்ளூர நாம் உணர முடியம்.

குர்ஆன் கூறும் வரலாற்றை ஆரம்பமான பார்ப்போம்.

யூனுஸ் தூதர்களில் ஒருவர்.

நிரப்பப்பட்ட கப்பலை நோக்கி அவர் ஒளிந்தோடியபோது, அவர்கள் (கப்பலில் இருந்து யாரை வெளியேற்றுவது என்று) சீட்டுக் குலுக்கினர். தோற்றவர்களில் அவர் ஆகி விட்டார்.

இழிந்தவராக இருக்கும் நிலையில் அவரை மீன் விழுங்கியது.

அவர் (நம்மை) துதிக்காது இருந்திருந்தால் அவர்கள் உயிர்ப்பிக்கப்படும் நாள் வரை அதன் வயிற்றிலேயே தங்கியிருப்பார்.

அவரை நோயுற்றவராக வெட்ட வெளியில் எறிந்தோம்.

அல்குர்ஆன் 37:142-145


இவ்வசனங்கள் (37:142, 21:87, 68:48) யூனுஸ் நபி அவர்கள் சில நாட்கள் மீன் வயிற்றில் சிறை வைக்கப்பட்டதாகக் கூறுகின்றன.

மீன் வயிற்றுக்குள் மனிதன் எப்படி உயிருடன் இருக்க முடியும்? ஆக்ஸிஜன் இல்லாமல் மனிதன் செத்து விடுவானே என்று சிலர் கேள்வி எழுப்புகிறார்கள்.

இறைவன் நாடினால் இது போன்ற அற்புதங்களை நிகழ்த்த முடியும் என்றாலும் மீன் வயிற்றில் யூனுஸ் நபியவர்கள் உயிருடன் இருந்ததற்கு அறிவியல் சாத்தியம் உள்ளது என்பதைக் கூடுதல் தகவலாகத் தருகிறோம்.

மனிதனை விழுங்கும் அளவில் கடலில் ஒரு மீன் உள்ளது என்றால் அது திமிங்கலம் என்ற மீன்தான்.

கடலில் உள்ள பல்வேறு திமிங்கலங்களில் நீலத் திமிங்கலம் என்ற ஒரு வகை உண்டு. இத்திமிங்கலத்தின் நாக்கில் 50 பேர் உட்காரக்கூடிய அளவு இடமிருக்கும். இத்தகைய திமிங்கலத்திடம் மூர்க்கமான குணங்கள் கிடையாது. இவை மிகவும் சாதுவானவை ஆகும்.

நாக்கில் மட்டும் ஐம்பது பேர் அமர முடியும் என்றால் அதன் வயிற்றுப் பகுதி எவ்வளவு பிரம்மாண்டமாக இருக்கும் என்று நாம் ஊகம் செய்து கொள்ளலாம்.

திமிங்கலம் மற்ற மீன்களில் இருந்து மாறுபட்ட படைப்பாகும். இது மீன் இனமாக இருந்தாலும் இது விலங்கினங்களைப் போல் தனது குட்டிகளுக்குப் பாலூட்டக் கூடிய உயிரினமாகும்.

மேலும் மீன்கள் தமது செவுள்களால் சுவாசிக்கின்றன. ஆனால் திமிங்கலங்கள் மனிதனைப் போன்ற நுரையீரல்களைக் கொண்டுள்ளதால் தமது நுரையீரல்களால் சுவாசிக்கக் கூடியவை. நீரின் மேல்மட்டத்துக்கு வந்து தேவையான காற்றை உள் இழுத்துக் கொள்ளும். நீருக்கு அடியில் மூச்சுவிடாமல் இரண்டு மணி நேரம் கூட மூச்சடக்கிக் கொள்ளும். மனிதர்கள் சுவாசிக்கும் போது காற்றில் இருந்து 15 சதம் ஆக்ஸிஜனை உள் இழுக்கிறோம், ஆனால் திமிங்கலங்கள் காற்றில் இருந்து 90 சதம் ஆக்ஸிஜனை உள் இழுத்துக் கொள்வதால் 7000 அடி ஆழம் சென்றாலும் இவற்றால் நீண்ட நேரம் மூச்சடக்க முடிகிறது.

திமிங்கலத்தின் இந்த தனித் தன்மையைக் கவனத்தில் கொண்டால் அவை சுவாசித்து உள்ளே சேமித்துக் கொள்ளும் ஆக்ஸிஜன் அதன் வயிற்றுக்குள் இருந்த யூனுஸ் நபி சுவாசிக்க போதுமானதாகும். ஆக்ஸிஜன் முடியும் நேரத்தில் அவை நீருக்கு மேல் தலையை நீட்டி காற்றை உள் இழுத்துக் கொள்ளும் அவசியம் உள்ளதால் யூனுஸ் நபிக்கு ஆக்ஸிஜன் பற்றாக்குறை ஏற்பட வழியில்லை.

ஒரு கண்ணாடி அறையில் வெளிக்காற்று புகாமல் அடைத்து ஒருவரை உள்ளே வைத்தால் அந்த அறைக்குள் இருக்கும் காற்றே சில மணி நேரங்கள் அந்த மனிதன் சுவாசிக்கப் போதுமானதாகும்.

திமிங்கலம் உள்ளிழுக்கும் காற்றில் அதிக ஆக்ஸிஜன் இருப்பதால் யூனுஸ் நபி மீன் வயிற்றில் உயிருடன் இருந்தது அறிவியலுக்கு உடன்பாடானது தான். இதில் அறிவியல் பூர்வமாக கேள்வி கேட்க வழியில்லை. இன்னும் சொல்வதாக இருந்தால் கடலில் இது போன்ற தனித்தன்மை வாய்ந்த மீன்களும் உள்ளன என்ற அறிவியல் முன்னறிவிப்பாக இதை எடுத்துக் கொள்ளலாம்.

(அறிஞர் பி.ஜெய்னுலாப்தீன் அவர்களின் திருக்குர்ஆன் மொழிபெயர்ப்பு விளக்கக் குறிப்பு எண் 395)

நீலத்திமிங்கிலங்களில் உள்ள அறிவியல் தன்மையும் குர்ஆன் கூறும் யூனுஸ் நபியின் அழகிய வரலாறும் குர்ஆனில் அறிவியல் பார்வையை மிக அழகாக எடுத்துரைக்கின்றன.

அமெரிக்க ஆய்வாளரான மைக்கேல் பெக்காட் அவர்களை விழுங்கியதும் ஒரு திமிங்கிலம் தான் என்பதும் மேலதிகமாக நாம் கவனிக்க வேண்டிய ஒன்றாகும்.

June 4, 2021

குஜராத், காஷ்மீரை தொடர்ந்து லட்சத்தீவு முஸ்லிம்களை அழிக்கத் துடிக்கும் இந்திய – மோடி அரசு.


 

இந்தியாவில் நரேந்திர மோடி பிரதமராக பொறுப்பேற்று பாரதீய ஜனதா கட்சியின் ஆட்சி அமையப்பெற்று இத்தனை ஆண்டுகளில் இனவாதத்தையும், மதவாதத்தையும் மாத்திரம் அடிப்படையாக வைத்தே அவர்களின் ஆட்சி தொடர்கிறது என்பது உலகறிந்த விஷயம்.

 

முஸ்லிம்கள் மீதான வெறுப்புணர்வை கக்கி ஆட்சிக்கு வந்தவர்கள் தமது ஆட்சியை நிலை நிறுத்திக் கொள்வதற்கும் தொடர்ந்தும் முஸ்லிம்கள் மீதான வெறுப்பையே கட்டவிழ்த்து வருகிறார்கள்.

 

உலகம் முழுவதும் முஸ்லிம்கள் சிறுபான்மையாக வாழும் நாடுகளில் முஸ்லிம்கள் பயங்கரவாதிகளாக காட்டி அல்லது முஸ்லிம்கள் மீதான பயத்தையும், வெறுப்பையும் உண்டாக்கியே பல நாடுகள் ஆட்சியை தக்கவைத்துக் கொள்கின்றன.

 

உய்க்குர் முஸ்லிம்களை சித்தரவதை செய்தும், தனிமைப்படுத்தப்பட்ட வதை முகாம்களில் வைத்து அநியாயம் செய்தும் அவர்களை பெரும் குற்றவாளிகளாகவும் சீன மக்களுக்கு எதிரிகளாகவும் சித்தரித்து சீனா தனது ஆட்சியை தொடர்கிறது.

 

ரோஹிங்யா முஸ்லிம்களை நாட்டுக்கு எதிரானவர்களாகவும், நாட்டின் துரோகிகளாகவும் சித்தரித்து சொல்ல முடியாத அளவு துன்பங்களை அவர்களுக்கு வழங்கி அதனை வைத்து அரசியல் நடத்திக் கொண்டு மியன்மாரின் ஆட்சிகள் கடக்கின்றன.

 

ரஷ்யாவுக்கு ஒரு செச்னியா, இஸ்ரேலுக்கு பலஸ்தீனம் என உலக நாடுகளின் பல அப்பாவி முஸ்லிம்களை வதை செய்தே தம் ஆட்சியை தக்கவைத்துக் கொண்டிருக்கின்றன.

 

அந்த வகையில் தான் இந்தியாவின் ஆளும் பாரதீய ஜனதா கட்சியும் இந்தியப் பிரதமர் நரேந்திர மோடியும் இந்திய முஸ்லிம்கள் மீதான வெறுப்பை உண்டாக்கியே தம் ஆட்சியை கொண்டு செல்கிறார்கள்.

 

எந்தத் தேர்தல் வந்தாலும் முஸ்லிம்களுக்கு எதிரான பிரச்சாரமே அவர்களின் தேர்தல் வியூகமாக அமைத்துக்கொள்ளப்படுகிறது.

 

இந்தியாவின் உத்தரபிரதேஷ் மாநிலத்தில் மாட்டுக் கரி வைத்திருந்தார்கள் எனக் கூறி மாட்டுக்காக முஸ்லிம்களை கொலை செய்ததும் அதனை சரி கண்டு பேசியதும் உலகமே காரித்துப்பிய ஜனநாயகமாகும்.

 

சிறுமி ஆசிபா கொலை செய்யப்பட்டதும் அதற்கு ஆதரவாக மோடியின் அமைச்சர்கள் முதல் உள்ளூர் அரசியல்வாதிகள் வரை கருத்து வெளியிட்டதும் கூட மனித நேயத்தை கொலை செய்த காரியங்கள் தான்.

 

இப்படி இந்தியா முழுவதும் முஸ்லிம்களை வைத்தே தமது காரியங்களை கச்சிதமாக முன்னெடுத்து செல்கிறது இந்திய மோடி அரசு.

 

தனி சுயாட்சிப் பகுதியாக இருந்த காஷ்மீரை பலவந்தமாக இந்தியாவுடன் இணைத்து காஷ்மீரில் வாழும் முஸ்லிம்களின் குடியுரிமையை பரித்து இன்று வரை அங்கு இந்திய இராணுவத்தை நிலைப்படுத்தி வைத்து அங்குள்ள முஸ்லிம்களை சொல்லொனாத் துன்பங்களுக்கு உள்ளாக்கி வருகிறது மோடி அரசு.

 

அதே பாணியில் தான் தற்போது முஸ்லிம்களின் நிறைந்து வாழும் தனி யூனியன் பிரதேசமாக இருக்கும் இந்தியாவின் லட்சத்தீவுகளையும் கொல்லையடித்து, அங்கு வாழும் முஸ்லிம்களை அழிக்கத் துடிக்கிறது இந்திய அரசு.

 

லட்சத்தீவுகள் ஓர் அறிமுகம்.

 

இந்தியாவின் பகுதியாக அறியப்பட்டாலும் லட்சத்தீவு என்பது தமிழ்நாட்டின் ஒரு பகுதியாகவே ஆரம்பத்தில் இருந்து வந்துள்ளது. பின்னர் தனி யூனியன் பிரதேசமாக அறிவிக்கப்பட்ட லட்சத்தீவுகளில் பல நூறு தீவுக்கூட்டங்கள் ஆரம்பத்தில் இருந்தாலும் தற்போது மொத்தமாக அங்கு இருப்பது 36 தீவுகள் மாத்திரம் தான்.

 

லட்சத் தீவுகளின் தலைநகரமாக கவுரத்தில் அறியப்படுகிறது. இங்கு மலையாளம், ஆங்கிலம், திவேஹி, ஜெஸரி ஆகிய மொழிகள் பேசும் மக்கள் வாழ்கிறார்கள்.

 

தீவுக்கூட்டங்களை கொண்ட பகுதி என்பதால் விமானம் மற்றும் கடல் மார்க்கமான மாத்திரமே இங்கு செல்ல முடியும்.

 

லட்சத்தீவுகளில் மொத்தமாகவே 65 ஆயிரம் மக்கள் மாத்திரமே வாழ்கிறார்கள். இந்த 65 ஆயிரம் மக்களில் பெரும்பான்மையானவர்கள் முஸ்லிம்கள் முழு மக்கள் தொகையில் 96.58 சதவீதத்தினர் முஸ்லிம்களாகவும், 2.77 சதவீதத்தினர் இந்துக்களாகவும் இருக்கும் அதே வேலை 0.49 சதவீதம் கிருஸ்தவர்களும் இங்கு வாழ்கிறார்கள்.

 

லட்சத்தீவுகளுக்கு என்று தனியான சட்டமன்றமோ ஆட்சி மன்றமோ கிடையாது. ஒரேயொரு மாநிலங்களவை உறுப்பினர் மட்டுமே இருக்கிறார்.

 

இந்திய மத்திய அரசினால் நியமிக்கப்படும் நிர்வாகி ஒருவர் தான் இதன் ஆட்சியாளராக அறியப்படுவார்.

 

இதுவரை காலமும் இந்தப் பிரதேசத்திற்கு IAS அல்லது IPS அதிகாரிகளே நிர்வாகிகளாக நியமிக்கப்பட்டார்கள். ஆனால் முதல் முறையாக தற்போது லட்சத்தீவுகளுக்கான நிர்வாகியாக ஒரு அரசியல்வாதி நியமிக்கப்பட்டுள்ளார். அவர் தான் பிரபுல் கோடா பட்டேல் என்பவராவார்.

 

 

குஜராத்தின் முதல்வராக இன்றைய இந்தியப் பிரதமர் மோடி செயல்பட்ட நேரத்தில் பிரபுல் கோடா பட்டேல் 2010ம் ஆண்டில் மோடியின் அமைச்சரவையில் அமைச்சராக பதவியில் அமர்த்தப்பட்டார்.

 

பின்னன் நடைபெற்ற குஜராத் மாநில தேர்தல்களில் தோல்வியை தழுவிய பிரபுல் கோடா பட்டேலை லட்சத்தீவுகள் போன்ற சில பகுதிகளுக்கு நிர்வாகியாக நியமித்தது மோடி அரசு. அதன் தொடரில் தான் தற்போது லட்சத்தீவுகளுக்கும் நிர்வாகியாக கடந்த வருடம் டிசம்பர் மாதத்தில் இவர் நியமிக்கப்பட்டார்.

 


சுற்றுலாப் பயணிகளின் வருகையை நம்பி வாழும் லட்சத்தீவு மக்களின் வாழ்வாதாரத்தையும் அவர்களின் வாழ்க்கை பயணத்தையும் திசை திருப்பும் வகையில் இவருடைய வருகை அமைந்துள்ளது.

 

குஜராத்தில் முஸ்லிம்களை கறுவறுத்த மோடி அரசு, அதே பாணியில் சட்டத்தின் மூலம் காஷ்மீரில் முஸ்லிம்களை உரிமைகளைப் பரித்தது. அதன் தொடரில் தற்போது லட்சத்தீவு முஸ்லிம்களின் வாழ்க்கையையும் வாழ்வாதாரத்தையும் பரித்து நடுத்தெருவில் விடும் வேலையில் மிக வேகமாக களமிறங்கியுள்ளது.

 

இதுவரை காலமும் லட்சத்தீவுகளில் அங்கு வாழும் மக்களைத் தவிர வேறு யாரும் இடங்களை வாங்கவோ விற்க்கவோ முடியாது. ஆனால் தற்போது அந்தத் சட்டத்தை மாற்றி அங்கு யார் வேண்டுமானாலும் இடத்தை வாங்களாம் விற்க்கலாம் என்று பிரபுல் கோடாவை வைத்து சட்டத்திருத்தம் கொண்டுவந்துள்ளது இந்திய மோடி அரசு.

 

சுற்றுலாத்துறையை நம்பி வாழும் லட்டத்தீவு மக்களின் வாழ்வில் பெருத்த இடியாக வீழ்ந்துள்ளது இந்த அறிவிப்பு.

 

லட்சத்தீவுகளின் பெரும்பான்மையாக வாழ்வோர் முஸ்லிம்கள் என்ற வகையில் அங்குள்ளவர்களின் பிரதான உணவாக மாட்டிரைச்சி இருக்கிறது. தற்போது மோடி அரசு கொண்டுவந்துள்ள புதிய சட்டத்திருத்தத்தின் பிரகாரம் லட்சத்தீவுகளில் மாட்டிரைச்சி உண்பதற்கு தடை விதிக்கப்பட்டுள்ளது.

 

ஆனால் இதுவரை காலம் அங்கு அனுமதிக்கப்படாமல் இருந்த சாராயத்திற்கு தற்போது அனுமதி வழங்கப்பட்டுள்ளது.

 

நாட்டை நாசமாக்கும் சாராயத்திற்கு அனுமதி வழங்கி மக்களின் பிரதான உணவாக இருக்கும் மாட்டிரைச்சிக்கு தடை விதித்து முஸ்லிம்களின் உண்ணும் உரிமையில் கைவைத்தது மாத்திரமன்றி மாபெரும் கலாசார சீரழிவுக்கும் வழியேற்படுத்தியுள்ளது மோடியின் இந்த புதிய சட்டத்திருத்தம்.

 

இன்னுமொரு முக்கியமான விஷயம் என்னவென்றால் கடந்த 2019ம் ஆண்டு வரையிலான கணக்கெடுப்பின்படி லட்சத்தீவுகளில் ஒரேயொரு கொலை அல்லது கொள்ளை வழக்குக் கூட பதிவு செய்யப்படவில்லை என்கிறது லட்சத்தீவு தொடர்பான தரவுகள்.

 

இந்த நிலையில் லட்சத்தீவுகளில் குண்டர் தடுப்புச் சட்டத்தை, புதிய சட்டத்திருத்தம் மூலம் கொண்டுவந்துள்ளது மோடி அரசாங்கம்.

 

எந்தவிதமான குற்றமும் நடைபெறாத ஒரு பிரதேசத்தில் ஏன் குண்டர் தடுப்புச் சட்டம் கொண்டுவரப்பட்டுள்ளது என அங்குள்ள மக்கள் கேள்வியெழுப்புகிறார்கள்.

 

பொதுவாக முஸ்லிம்கள் அதிக குழந்தை பெருவதில் ஆர்வம் கொண்டவர்கள். இஸ்லாமும் அதனை வரவேற்கிறது. குறிப்பாக குழந்தை என்பதே இறைவனின் மிகப்பெரும் அருளாகும். குழந்தையில்லாமல் வாழ்நாள் முழுவதும் கண்ணீருடன் வாழும் குடும்பங்களுக்குத்தான் குழந்தையின் அருமை தெரியும் என்பார்கள். இஸ்லாம் குடும்ப வாழ்வை மிக சீரான வழிகாட்டல்களுடன் முன்மொழிந்துள்ளதினால் முஸ்லிம்கள் குடும்ப வாழ்வில் பின்னிப் பினைந்தவர்களாக இருக்கிறார்கள்.

 

லட்சத்தீவுகளில் முஸ்லிம்களுக்கு எதிராக மோடி அரசாங்கம்  கொண்டுவந்துள்ள சட்டத்திருத்தத்தில் இன்னுமொரு முக்கியமான திருத்தம் என்னவென்றால் 2 குழந்தைகளுக்கு மேல் பெற்றுக்கொள்ளும் எவறும் மாவட்ட பஞ்சாயத்து தேர்தலில் போட்டியிடுவதற்கு தடை விதிக்கப்பட்டுள்ளது.

 

இதன் மூலம் முஸ்லிம்களின் மக்கள் தொகையை குறைக்கும் மிகப்பெரும் சூழ்ச்சியை அரங்கேற்ற முயல்வதுடன் உள்ளாட்சி மன்ற பஞ்சாயத்து பொறுப்புகளிலிருந்து பெரும்பான்மையான முஸ்லிம்களை ஓரங்கட்டும் திட்டத்தையும் மோடி அரசு நுழைவிக்கிறது.

 

மோடியின் அரசினால் நியமிக்கப்பட்டுள்ள புதிய நிர்வாக பிரபுல் கோடா பொறுப்பை ஏற்றுக் கொள்வதற்கு முன்பதாக லட்சத்தீவுகளில் எவ்விதமான கொரோனா தாக்கங்களும் இருக்கவில்லை. குறிப்பாக இந்தியாவில் மிகப்பெரும் தாக்கத்தை உண்டாக்கிய கொரோனா முதல் அலையின் போது இங்கு எந்தவொரு கொரோனா நோயாளியும் கண்டறியப்படவில்லை.

 

ஆனால், நிர்வாகப் பொறுப்பை கையில் எடுத்த ஒரு சில வாரங்களிலேயே அங்குள்ள கொரோனா விதிகளை தளர்தினார் மோடியின் நிர்வாக பிரபுல் கோடா. இதனால் கொரோனா தொற்று வேகமாக லட்சத்தீவுகளில் பரவ ஆரம்பித்தது. தற்போது வரை சுமார் 6 ஆயிரம் பேர் கொரோனா தொற்றினால் அங்கு பாதிக்கப்பட்டுள்ளதாக தரவுகள் குறிப்பிடுகின்றன.

 

முஸ்லிம்கள் எந்த மூலையில் இருந்தாலும் அவர்களின் நிம்மதியை கெடுத்து அவர்களின் வாழ்வாதாரத்தை இல்லாமல் செய்து அதன் மூலம் ஆட்சியை தக்கவைத்துக் கொள்ள இனவாதமும் மதவாதமும் பேசி வரும் இந்திய மத்திய அரசின் மோடி வகையராக்களின் லட்சத்தீவுகள் அபகரிப்பு தொடர்பில் ஜனநாயவாதிகள் பலரும் எதிர்ப்புகளை வெளியிட்டு வருகின்றார்கள்.

 


கேரளாவின் ஆளும் அரசு சார்பில் லட்சத்தீவுகளுக்கு நியமிக்கப்பட்ட மோடியில் நிர்வாகி பிரபுல் கோடாவை அப்பொறுப்பிலிருந்து அகற்ற வேண்டும் என கேரள முதல்வர் சட்ட சபையில் தீர்மானமொன்றையும் கொண்டு வந்துள்ளார்.

 

இதே வேலை லட்சத்தீவுகளில் இருக்கும் தென்னை மரங்களுக்குக் கூட மோடி அரசு காவி நிரம் பூசியுள்ளதாகவும் லட்சத்தீவுகளையும் காவி மயமாக்கும் ஒரு திட்டம் தான் இதுவென்றும் தமிழ்நாடு முஸ்லிம் முன்னேற்றக் கழக தலைவரும், தமிழ்நாடு சட்டமன்ற உறுப்பினருமான பேராசிரியர் ஜவாஹிருல்லாஹ் தனது கண்டன அறிக்கையில் தெரிவித்துள்ளார்.

 

லட்சத்தீவுகளின் ஜனநாயகம் காக்கப்பட்டு, அங்கு வாழும் மக்கள் இதுவரை காலமும் வாழ்ந்ததை போல் எவ்வித சங்கடங்களும் இன்றி நிம்மதியாக வாழ வேண்டும் என்பதே நல்லுள்ளம் கொண்ட அனைவரினதும் பிராத்தனையும் விருப்பமுமாகும்.

 

ஜனநாயகம் வெற்றியடையும் போது இனவாதம் தோற்று மண்ணைக் கவ்வும் என்பதில் சந்தேகமில்லை.

June 1, 2021

பராஅத் இரவு எனும் பெயரில் நடக்கும் கொண்டாட்டங்களுக்கும், வழிபாடுகளுக்கும் இஸ்லாத்திற்கும் எவ்வித தொடர்பும் இல்லை.


 
ஷஃபான் 15 இல் நோன்பு நோற்பதற்கு ஆதாரபூர்வமான நபிமொழிகளில் எவ்வித வழிகாட்டல்களும் கிடையாது.



ஷஅபான் மாதம் பதினைந்தாம் இரவை ஷபே பராஅத் என்ற பெயரில் சிறப்புமிக்க இரவாகக் கருதி அந்த இரவு முழுவதும் விழித்து நோன்பு நோற்று பல விதமான வணக்கங்களைச் சிலர் செய்து வருகிறார்கள்.

இந்த இரவு சிறப்புமிக்க இரவு என்பதற்கு கீழே நாம் எடுத்துக்காட்டும் செய்திகளை ஆதாரங்களாக எடுத்துக் காட்டுகின்றனர்.

முதல் ஆதாரம்

தெளிவான இவ்வேதத்தின் மீது சத்தியமாக! இதை பாக்கியம் நிறைந்த இரவில் நாம் அருளினோம். நாம் எச்சரிக்கை செய்வோராவோம். அதில் தான் உறுதியான காரியங்கள் யாவும் பிரிக்கப்படுகின்றன.

திருக்குர்ஆன் 44:2-4

இவ்வசனத்தில் கூறப்பட்டுள்ள பாக்கியமுள்ள இரவு பராஅத் இரவு தான் என்பது இவர்களின் முதல் ஆதாரமாகும்.

பாக்கியமுள்ள இரவு என்று அல்லாஹ் ஒரு இரவைக் குறிப்பிட்டால் நிச்சயம் அது பாக்கியமிக்கது தான். அதில் எந்தச் சந்தேகமும் இல்லை.

ஆனால் பாக்கியமிக்க இரவு என்பது ஷஅபான் மாதத்தின் 15 ஆம் இரவு என்பதற்கு எந்த ஆதாரமும் இல்லை.

பாக்கியமிக்க இரவு என்று அல்லாஹ் கூறும் போது அதற்கான காரணத்தையும் சேர்த்தே சொல்கிறான்.

இந்த இரவில் திருக்குர்ஆனை நாம் இறக்கினோம் என்பது தான் அந்தக் காரணமாகும்.

எந்த இரவில் குர்ஆன் அருளப்பட்டதோ அந்த இரவைத் தான் இவ்வசனம் குறிப்பிடுகிறது.

எந்த இரவில் குர்ஆன் அருளப்பட்டது என்பதை நாம் திருக்குர்ஆனில் தேடிப் பார்த்தால் அந்த இரவு ரமலான் மாதத்தில் உள்ள லைலத்துல் கத்ர் இரவு என்று அறிந்து கொள்ளலாம்.

இந்தக் குர்ஆன் ரமளான் மாதத்தில் தான் அருளப்பட்டது. (அது) மனிதர்களுக்கு நேர்வழி காட்டும். நேர்வழியைத் தெளிவாகக் கூறும். (பொய்யை விட்டு உண்மையை) பிரித்துக் காட்டும். உங்களில் அம்மாதத்தை அடைபவர் அதில் நோன்பு நோற்கட்டும்.

திருக்குர்ஆன் 2:185

மகத்துவமிக்க இரவில் இதை நாம் அருளினோம்.

திருக்குர்ஆன் 97:1

அந்த இரவு ரமலான் மாதத்தில் உள்ள லைலத்துல் கத்ர் இரவு தான் என்று இவ்வசனங்கள் மூலம் அல்லாஹ் விளக்கம் கொடுத்து விட்டான்.

பாக்கியமிக்க இரவு என்பது ரமலான் மாதத்தில் உள்ள லைத்துல் கத்ரைத் தான் குறிக்கிறதே தவிர ஷஅபான் மாதத்தின் 15 ஆம் இரவு அல்ல என்பது மிகத் தெளிவாகத் தெரிகின்றது. எனவே பராஅத் இரவுக்கும் இவர்கள் காட்டும் வசனத்திற்கும் எந்தச் சம்பந்தமுமில்லை.

இரண்டாம் ஆதாரம்

حدثنا الحسن بن علي الخلال حدثنا عبد الرزاق أنبأنا ابن أبي سبرة عن إبراهيم بن محمد عن معاوية بن عبد الله بن جعفر عن أبيه عن علي بن أبي طالب قال قال رسول الله صلى الله عليه وسلم إذا كانت ليلة النصف من شعبان فقوموا ليلهاوصوموا نهارها فإن الله ينزل فيها لغروب الشمس إلى سماء الدنيا فيقول ألا من مستغفر لي فأغفر له ألا مسترزق فأرزقه ألا مبتلى فأعافيه ألا كذا ألا كذا حتى يطلع الفجر – ابن ماجة 1378


ஷஅபான் மாதத்தில் பாதி இரவு வந்து விட்டால் அதில் நீங்கள் நின்று வணங்குங்கள். அந்தப் பகலில் நோன்பு பிடியுங்கள். அந்த இரவில் இறைவன் வானத்திலிருந்து இறங்கி வந்து, பாவமன்னிப்புத் தேடுவோர் உண்டா? நான் அவர்களின் பாவங்களை மன்னிக்கிறேன். சோதனைக்கு ஆளானோர் உண்டா? நான் அவர்களின் துன்பங்களைப் போக்குகின்றேன். என்னிடம் உணவு கேட்பவர் உண்டா? நான் அவர்களுக்கு உணவளிக்கிறேன் என்று காலை வரை கூறிக் கொண்டேயிருக்கிறான் என நபிகள் நாயகம் (ஸல்) அவர்கள் கூறினார்கள்.

அறிவிப்பவர் : அலீ (ரலி)

நூல் : இப்னுமாஜா 1378

இப்னுமாஜாவில் பதிவு செய்யப்பட்டுள்ள இந்தச் செய்தி ஆதாரப்பூர்வமான செய்தி அல்ல.

இப்னு அபீ ஸப்ரா என்பவர் வழியாக இச்செய்தி அறிவிக்கப்பட்டுள்ளது. இவரது இயற்பெயர் அபூபக்ர் பின் அப்துல்லாஹ் பின் முஹம்மது அபீ புஸ்ரா” ஆகும்.

موسوعة أقوال الإمام أحمد بن حنبل في رجال الحديث وعلله


قال عبد الله بن أحمد: سمعتُ أَبي يقول: أبو بكر بن أبي سبرة كان يضع الحديث، ثم قال: قال حجاج: قال لي أبو بكر السبري: عندي سبعون ألف حديث في الحلال والحرام. قال أبي: وليس حديثه بشيء، كان يكذب ويضع الحديث.


இப்னு அபீ ஸப்ரா என்பவர் ஹதீஸ்கள் என்ற பெயரால் இட்டுக்கட்டிக் கூறுபவர் என அஹ்மத் பின் ஹம்பல் அவர்கள் கூறியுள்ளார்கள்.

ت أبو بكر بن عبد الله ق بن أبي سبرة المدني القاضي الفقيه عن الأعرج وعطاء بن أبي رباح وعنه عبد الرزاق وأبو عاصم و جماعة ضعفه البخاري و غيره وروى عبد الله وصالح ابنا أحمد عن أبيهما قال كان يضع الحديث

ميزان الإعتدال في نقد الرجال

இப்னு அபீ ஸப்ரா என்பவர் பலவீனமனவர் என்று புகாரி அவர்களும், ஹதீஸ்களை கட்டுக்கட்டிச் சொல்பவர் என்று அஹ்மத் பின் ஹம்பல் அவர்களும் கூறியுள்ளனர்.

666 أبو بكر بن عبد الله بن أبي سبرة متروك الحديث (الضعفاء والمتروكين للنسائي

அபூபக்ர் என்பார் பலவீனமானவர் என்று நஸாயி அவர்கள் அல்லுஅஃபாஉ வல் வல்மத்ருகீன் என்ற நூலில் குறிப்பிட்டுள்ளார்.

மூன்றாம் ஆதாரம்

سنن الترمذي

739 – حَدَّثَنَا أَحْمَدُ بْنُ مَنِيعٍ قَالَ: حَدَّثَنَا يَزِيدُ بْنُ هَارُونَ قَالَ: أَخْبَرَنَا الحَجَّاجُ بْنُ أَرْطَاةَ، عَنْ يَحْيَى بْنِ أَبِي كَثِيرٍ، عَنْ عُرْوَةَ، عَنْ عَائِشَةَ قَالَتْ: فَقَدْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ لَيْلَةً فَخَرَجْتُ، فَإِذَا هُوَ بِالبَقِيعِ، فَقَالَ: «أَكُنْتِ تَخَافِينَ أَنْ يَحِيفَ اللَّهُ عَلَيْكِ وَرَسُولُهُ»، قُلْتُ: يَا رَسُولَ اللَّهِ، إِنِّي ظَنَنْتُ أَنَّكَ أَتَيْتَ بَعْضَ نِسَائِكَ، فَقَالَ: «إِنَّ اللَّهَ عَزَّ وَجَلَّ يَنْزِلُ لَيْلَةَ النِّصْفِ مِنْ شَعْبَانَ إِلَى السَّمَاءِ الدُّنْيَا، فَيَغْفِرُ لِأَكْثَرَ مِنْ عَدَدِ شَعْرِ غَنَمِ كَلْبٍ» وَفِي البَابِ عَنْ أَبِي بَكرٍ الصِّدِّيقِ.: «حَدِيثُ عَائِشَةَ لَا نَعْرِفُهُ إِلَّا مِنْ هَذَا الوَجْهِ مِنْ حَدِيثِ الحَجَّاجِ»،

وَسَمِعْتُ مُحَمَّدًا يُضَعِّفُ هَذَا الحَدِيثَ، وقَالَ: يَحْيَى بْنُ أَبِي كَثِيرٍ لَمْ يَسْمَعْ مِنْ عُرْوَةَ، وَالحَجَّاجُ بْنُ أَرْطَاةَ لَمْ يَسْمَعْ مِنْ يَحْيَى بْنِ أَبِي كَثِيرٍ “

அன்னை ஆயிஷா (ரலி) அவர்கள் ஒரு நாள் இரவு, படுக்கையில் நபிகள் நாயகம் (ஸல்) அவர்களைக் காணாமல் வெளியே தேடி வந்தார்கள். அப்போது அவர்கள் பகீவு என்ற இடத்தில் நின்று கொண்டிருந்தார்கள். ஷஅபான் மாதம் 15 ஆம் இரவில் அல்லாஹ் முதல் வானத்திற்கு இறங்கி கலப் கோத்திரத்தாரின் ஆட்டு ரோமத்தின் எண்ணிக்கை அளவுக்கு (பாவங்களை) மன்னிக்கின்றான் என்று அப்போது நபிகள் நாயகம் (ஸல்) அவர்கள் கூறினார்கள்.

அறிவிப்பவர் : ஆயிஷா (ரலி)

நூல்: திர்மிதி

இந்த ஹதீஸ் ஆதாரப்பூர்வமானது அல்ல என்பதை இதைப் பதிவு செய்த திர்மிதீ அவர்களே விளக்கியுள்ளார்கள்.

இதன் அறிவிப்பாளர்களில் ஒருவரான யஹ்யா பின் அபீ கஸீர் என்பார் உர்வா என்பார் வழியாக அறிவிப்பதாக இதில் கூறப்பட்டுள்ளது. ஆனால் யாஹ்யா பின் அபீ கஸீர் என்பார் உர்வாவிடம் எதையும் செவியுற்றதில்லை என்று புகாரி கூறுகிறார். மேலும் ஹஜ்ஜாஜ் பின் அர்தாத் என்பார் இதை யஹ்யா பின் அபீ கஸீர் வழியாக அறிவிப்பதாக இதில் கூறப்பட்டுள்ளது. ஆனால் ஹஜ்ஜாஜ் என்பார் யஹ்யா பின் அபீ கஸீரிடம் எதையும் செவியுறவில்லை. எனவே இது பலவீனமான ஹதீஸ் என்று புகாரி கூறுகிறார். இந்த விபரத்தை இந்த ஹதீஸின் இறுதியில் திர்மிதி அவர்களே குறிப்பிட்டுள்ளார்கள்.

எனவே இதையும் ஆதாரமாகக் கொள்ள முடியாது.

நான்காவது ஆதாரம்

مصنف ابن أبي شيبة

9764 – حَدَّثَنَا يَزِيدُ، قَالَ: أَخْبَرَنَا الْمَسْعُودِيُّ، عَنِ الْمُهَاجِرِ أَبِي الْحَسَنِ، عَنْ عَطَاءِ بْنِ يَسَارٍ، قَالَ: «لَمْ يَكُنْ رَسُولُ اللَّهِ صَلَّى اللهُ عَلَيْهِ وَسَلَّمَ فِي شَهْرٍ أَكْثَرَ صِيَامًا مِنْهُ فِي شَعْبَانَ وَذَلِكَ أَنَّهُ تُنْسَخُ فِيهِ آجَالُ مَنْ يَمُوتُ فِي السَّنَةِ

நபிகள் நாயகம் (ஸல்) அவர்கள் ஷஅபான் மாதத்தில் அதிக நோன்பு நோற்பதைப் போல் வேறு எந்த மாதத்திலும் நோற்பவர்களாக இருக்கவில்லை. அந்த ஆண்டு மரணிக்க உள்ளவர்களின் தவணை அம்மாதத்தில் மாற்றப்படுகிறது என்பதே இதற்குக் காரணம்.

அறிவிப்பாளர்: அதாவு பின் யஸார்

நூல்கள்: முஸன்னப் இப்னு அபீஷைபா

இதை அறிவிக்கும் அதாவு பின் யஸார் என்பவர் நபிகள் நாயகம் (ஸல்) அவர்களின் காலத்தைச் சேர்ந்தவர் அல்ல. அதாவது நபித்தோழர் அல்ல. நபிகள் நாயகம் (ஸல்) அவர்கள் தொடர்பான எந்தச் செய்தியாக இருந்தாலும் அதன் முதல் அறிவிப்பாளராக நபித்தோழர் தான் இருக்க வேண்டும். நபித்தோழர் அல்லாதவர் அறிவித்தால் அது பலவீனமான ஹதீஸாகும்.

ஐந்தாவது ஆதாரம்

فضائل رمضان لابن أبي الدنيا

9 – أَخْبَرَنَا ابْنُ إِدْرِيسَ، عَنْ أَبِي الْحَسَنِ الْحُسَيْنِيِّ، عَنْ مُحَمَّدٍ الْعَرْزَمِيِّ، عَنْ مُحَمَّدِ بْنِ عَلِيٍّ، رَفَعَهُ قَالَ: «مَنْ صَلَّى لَيْلَةَ النِّصْفِ مِنْ رَمَضَانَ، وَلَيْلَةَ النِّصْفِ مِنْ شَعْبَانَ مِائَةَ رَكْعَةٍ يَقْرَأُ فِيهَا بِقُلْ هُوَ اللَّهُ أَحَدٌ أَلْفَ مَرَّةٍ، لَمْ يَمُتْ حَتَّى يُبَشَّرَ بِالْجَنَّةِ

ரமலான் மாதம் நடுப்பகுதி 15ஆம் இரவிலும், ஷஅபான் மாதம் நடுப்பகுதி 15ஆம் இரவிலும் இக்லாஸ் எனும் அத்தியாயத்தை 1000 தடவை ஓதி எவர் 100 ரக்அத்கள் தொழுகின்றாரோ அவருக்கு சொர்க்கத்தைக் கொண்டு நற்செய்தி சொல்லப்படும் வரை அவர் மரணிக்க மாட்டார் என்று நபிகள் நாயகம் (ஸல்) அவர்கள் கூறினார்கள்.

அறிவிப்பவர் : முஹம்மத் பின் அலீ

நூல் : ஃபலாயிலு ரமலான்- இப்னு அபித் துன்யா

முஹம்மத் பின்அலீ என்பவர் நபிகள் நாயகம் (ஸல்) அவர்களின் காலத்தில் வாழ்ந்தவர் அல்ல. எனவே இச்செய்தியும் பலவீனமான செய்தியாகும்.

எனவே பராஅத் இரவு குறித்து எந்த ஆதாரப்பூர்வமான செய்தியும் இல்லை.

மேலும் இந்த இரவில் மூன்று தடவை யாஸீன் அத்தியாயம் ஓத வேண்டும்; முதல் யாஸீன் பாவமன்னிப்பிற்காகவும், இரண்டாவது யாஸீன் மரணித்தவர்களுக்கு நன்மை சேர்க்கவும், மூன்றாவது யாஸீன் நீண்ட ஆயுளுக்காகவும் என்று ஓதுகின்றனர்.

இப்படி ஓத வேண்டும் என்று நபிகள் நாயகம் (ஸல்) அவர்கள் கூறவில்லை. இது போலி ஆலிம்கள் வீடுகளுக்குப் போய் சம்பாதிப்பதற்காக உருவாக்கிய பொய் வணக்கமாகும்.

ஷஅபான் மாதம் 15 ஆம் இரவில் நோன்பு நோற்பதும் பித்அத்தாகும்.

صحيح البخاري

2697 – حَدَّثَنَا يَعْقُوبُ، حَدَّثَنَا إِبْرَاهِيمُ بْنُ سَعْدٍ، عَنْ أَبِيهِ، عَنِ القَاسِمِ بْنِ مُحَمَّدٍ، عَنْ عَائِشَةَ رَضِيَ اللَّهُ عَنْهَا، قَالَتْ: قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «مَنْ أَحْدَثَ فِي أَمْرِنَا هَذَا مَا لَيْسَ فِيهِ، فَهُوَ رَدٌّ»

நமது மார்க்கத்தில் ஒருவர் புதிதாக ஒன்றை உருவாக்கினால் அது ரத்து செய்யப்படும் என்று நபிகள் நாயகம் (ஸல்) அவர்கள் கூறினார்கள்.

அறிவிப்பவர் : ஆயிஷா (ரலி)

நூல் : புகாரி 2697

صحيح مسلم

4590 – وَحَدَّثَنَا إِسْحَاقُ بْنُ إِبْرَاهِيمَ وَعَبْدُ بْنُ حُمَيْدٍ جَمِيعًا عَنْ أَبِى عَامِرٍ قَالَ عَبْدٌ حَدَّثَنَا عَبْدُ الْمَلِكِ بْنُ عَمْرٍو حَدَّثَنَا عَبْدُ اللَّهِ بْنُ جَعْفَرٍ الزُّهْرِىُّ عَنْ سَعْدِ بْنِ إِبْرَاهِيمَ قَالَ سَأَلْتُ الْقَاسِمَ بْنَ مُحَمَّدٍ عَنْ رَجُلٍ لَهُ ثَلاَثَةُ مَسَاكِنَ فَأَوْصَى بِثُلُثِ كُلِّ مَسْكَنٍ مِنْهَا قَالَ يُجْمَعُ ذَلِكَ كُلُّهُ فِى مَسْكَنٍ وَاحِدٍ ثُمَّ قَالَ أَخْبَرَتْنِى عَائِشَةُ أَنَّ رَسُولَ اللَّهِ -صلى الله عليه وسلم- قَالَ « مَنْ عَمِلَ عَمَلاً لَيْسَ عَلَيْهِ أَمْرُنَا فَهُوَ رَدٌّ ».

நமது அனுமதியில்லாமல் ஒரு அமலைச் செய்தால் அது நிராகரிக்கப்படும் என்று நபிகள் நாயகம் (ஸல்) அவர்கள் கூறினார்கள்.

அறிவிப்பவர் : ஆயிஷா (ரலி)

நூல் : முஸ்லிம்

நபிகள் நாயகம் (ஸல்) அவர்களின் இந்த எச்சரிக்கைக்கு மதிப்பளித்து பிற்காலத்தில் உருவாக்கப்பட்ட பராஅத் வணக்கங்களை விட்டொழிப்போமாக!

கொழும்பு தெஹிவலையில் 2 ஹாபிழ்கள் ஷவ்வால் தலைப்பிறையை கண்டார்களா? - மார்க்க விளக்கம் என்ன?


 

இலங்கையில் இன்று எப்பகுதிகளிலும் ஷவ்வால் தலைப்பிறை தென்படாத காரணத்தினால் ரமழான் மாதம் 30 ஆக பூர்த்தி செய்யப்பட்டுள்ளது. இன்ஷா அல்லாஹ் வெள்ளிக்கிழமை புனித மிக்க நோன்புப் பெருநாள் இலங்கையில் கொண்டாடப்படவுள்ளது.


இந்நிலையில் கொழும்பு, தெஹிவலையில் இரண்டு ஹாபிழ்கள் தமது தொழுகையை முடித்தவுடன் தாம் தொழுது கொண்டிருந்த 03ம் மாடியிலிருந்து தலைப்பிறையை பார்த்ததாக வேறு ஒருவர் பேசும் ஓடியோ பதிவொன்று சமூக வலைதளங்களில் பகிரப்பட்டு வருகின்றது. 


குறித்த ஓடியோவில் பேசும் நபர், தான் தலைப் பிறையை பார்க்க வில்லை என்றும் தனது உறவுக்காரர்களான இரண்டு ஹாபிழ்களே 03ம் மாடியிலிருந்து பிறையை கண்டதாகவும் குறிப்பிடுகிறார்.


மார்க்க அடிப்படையில் தலைப்பிறையை யார் கண்ணால் கண்டார்களோ அவர்கள் தான் அல்லாஹ்வின் மீது சத்தியம் செய்து சாட்சியம் வழங்க வேண்டும். ஆனால் தற்போது ஏற்பட்டுள்ள சர்சையில் பிறையை காணாத ஒருவர்  வேறு இரு ஹாபிழ்கள் கண்டதாக, அந்த இருவருக்கும் பதிலாக சாட்சியம் வழங்குகிறார். 


பிறையை கண்ணால் பார்த்ததாக கூறப்படும் இரு ஹாபிழ்களும் அவர்கள் பிறையை பார்த்தது உண்மையென்றிருந்தால் அல்லாஹ்வின் மீது சத்தியமிட்டு உரிய முறைப்படி தமது சாட்சியத்தை முன்வைக்க வேண்டும். அப்படி அவர்கள் உரிய முறையில் சாட்டியத்தை வழங்காமல் வேறு ஒருவர் கூறும் தகவலை மட்டும் அடிப்படையாக வைத்து நாம் பெருநாளை தீர்மானிக்க முடியாது.

பிறையை கண்டவர்கள் தான் நேரடியாக இறைவன் மீது சத்தியம் செய்து சாட்சியம் வழங்க வேண்டும். ஆனால் இங்கு அப்படியொரு சாட்சியம் வழங்கப்படவில்லை. 


அதே வேலை, குறித்த ஓடியோவில் பேசும் நபரை தொடர்பு கொள்வதற்காக சமூக வலைதளங்களில் பகிரப்படும் சுமார் 03க்கும் மேற்பட்ட தொலைபேசி இலக்கங்களை 100 தடவைகளுக்கு மேல் தொடர்பு கொண்டும் அதில் 2 தொலை பேசி இலக்கங்கள் முழுமையாக OFF செய்யப்பட்டுள்ளன. 


மற்றைய ஒரு இலக்கத்திற்கு பல தடவைகள் தொடர்பு கொண்ட நிலையில் பல முறை அந்த இலக்கத்திற்கு சொந்தக்காரர் தொடர்பை துண்டித்துக்கொண்டே இருக்கிறார்.  


அதன் பின்னர் போனை அவர் ஆன்ஸ்வர் பண்ணாமல் இருக்கிறார். இந்த நிமிடம் வரை முயற்சித்தும் பலனில்லை. 


இதே வேலை பிறை பார்க்க வேண்டிய நேற்றைய மஃரிபுக்கு பின்னரான நேரம் கொழும்பு, தெஹிவளை உள்ளிட்ட பகுதிகளில் பெரும் மேகமூட்டம் காணப்பட்டதுடன் மழையும் பெய்தமை மேலதிக தகவலாகும். 


பிறையை கண்ணால் காணாத ஒருவரின் ஓடியோவை வைத்து நாம் எந்த முடிவுக்கும் வர முடியாது என்பதுடன் குறித்த நபரின் தகவலை முழுவதும் புறக்கணிப்பதே மார்க்கத்தின் அடிப்படையாகும். காரணம் பிறையை காணாத ஒருவர் சாட்சி சொல்ல தகுதியற்றவராகிறார்.


உமக்கு அறிவு இல்லாததை நீர் பின்பற்றாதீர்! செவி, பார்வை, உள்ளம் ஆகிய அனைத்துமே விசாரிக்கப் படுபவையாகும். 


அல்குர்ஆன் 17:36


உனக்குச் சந்தேகமானதை விட்டு விட்டு சந்தேகமற்றதன் பக்கம் சென்று விடு என்று அல்லாஹ்வின் தூதர் (ஸல்) அவர்கள் கூறினார்கள்.


அறிவிப்பவர்: ஹஸன் பின் அலீ (ரலி) நூல்: திர்மிதீ 2442


எனவே, ஆதாரமற்ற வெறும் சந்தேகத்தை மட்டும் உண்டாக்கும் குறித்த ஓடியோவை கணக்கில் கொள்ளத் தேவையில்லை. 


இலங்கை முஸ்லிம்களாகிய நாம் ரமழானை 30 ஆக பூர்த்தி செய்யும் வகையில் வியாழக்கிழமையும் நோன்பை நோற்றுவிட்டு வெள்ளிக்கிழமை புனிதமிக்க நோன்புப் பெருநாளை கொண்டாடுவதே மார்க்க அடிப்படையிலான விளக்கமாகும்.

April 5, 2021

தமிழக சட்டமன்ற தேர்தல் - மதச்சார்பற்ற திமுக கூட்டணி வெற்றிபெறுவது காலத்தின் கட்டாயம்; ஏன்?


 
இன்ஷா அல்லாஹ் நாளை ஏப்ரல் 06ம் திகதி தமிழக சட்டமன்ற தேர்தல் நடைபெறவுள்ளது.

தமிழக சட்ட மன்றத்திற்க்கான தேர்தல் கடந்த காலங்களை விட இம்முறை பல விதங்களில் முக்கியத்துவம் பெற்றுள்ளது.

மு. கருணாநிதி, ஜெ. ஜெயலளிதா என்ற இரண்டு துருவங்கள் இல்லாத தேர்தல் இது.

எடப்பாடி பழனிச்சாமி தலைமையிலான பெயரளவு அதிமுக ஆட்சியும் உண்மையான பஜக ஆட்சியும் நீட்சியை நோக்கி நகரும் தருணத்தில் வரும் தேர்தல் இது.

குறிப்பாக அதிமுக, மோடியின் பஜக, ராமதாசின் பாமக கட்டிகளின் பாசித மனிதகுல விரோத கூட்டணி ஒரு பக்கமும்,

ஸ்டாலின் தலைமையிலான தி.மு.க, கம்பியூனிஸ்டுகள், முஸ்லிம் சமுதாய கட்சிகளான தமுமுக வின் மனித நேய மக்கள் கட்சி, முஸ்லிம் லீக், மற்றும் தோழர் திருமாவளவன் தலைமையிலான விடுதலை சிறுத்தைகள் உள்ளிட்ட மதச் சார்பற்ற கூட்டணி மறுபக்கமும்,

சீமானின் நாம் தமிழர் கட்சி, டிடிவி தினகரனின் அமமுக மற்றும் விஜயகாந்தின் தேமுதிக, கமல்ஹாசனின் மக்கள் நீதி மையம் என ஏகப்பட்ட உதிரிக் கட்சிகளும் இன்னும் பெயர்களை எழுதி முடிக்க முடியாதளவுக்குண்டான கட்சிகளும் இம்முறை தமிழக சட்ட சபை தேர்தலில் களம் கண்டு பிரச்சாரத்தையும் முடித்து விட்டன.

இந்தத் தேர்தல் தமிழகத்துடன் சேர்த்து இன்னும் சில மாநிலங்களுக்கான மாநில தேர்தலாக நடைபெற்றாலும் தமிழக தேர்தல் பெரும் கவனத்தை ஈர்த்துள்ளது.

குறிப்பாக
மாட்டுக்காக மனிதனை கொல்வதையும்,
பெண்களை கற்பழிப்பதையும்,
மதத் தளங்களை அபகரிப்பதையும்,
மதத்தின் பெயரால் கலவரங்களை தூண்டுவதையும்,
ஜாதியின் பெயரால் சமூகங்களை பிளவுபடுத்துவதையும்,
ஆட்சிக்காக எந்த அநியாயத்தையும் செய்வதும், ஆதரிப்பதும் தான் நம் கடமை என அத்தனை அநியாயங்களுக்கும் துணை நிற்க்கும் உலக மகா கொடுங்கோலன், மனிதகுல விரோதி நரேந்திர மோடி தலைமையிலான பாரதிய ஜனதா கட்சி சார்ந்த மொத்த மனித குல விரோதிகளும் ஒரு பக்கமும்,

மனித நேய விரும்பிகளும், ஜனநாயகவாதிகளும் மறுபக்கமுமாக அமைந்துள்ள காரணத்தினால் தான் இந்தத் தேர்தல் மிகவும் முக்கியத்துவம் பெறுகிறது.

இம்முறை திமுக கூட்டணியில் மமக, முஸ்லிம் லீக் உள்ளிட்ட முஸ்லிம் கட்சிகள் இணைந்து போட்டியிடுகின்றன. மமக சார்பில் பேராசிரியர் ஜவாஹிருல்லாஹ் மற்றும் ப. அப்துஸ் சமத் ஆகியோர் திமுக வின் உதய சூரியர் சின்னத்திலேயே போட்டியிடுகிறார்கள்.

திமுக கூட்டணியில் அங்கம் வகிக்கும் விடுதலை சிறுத்தைகள் கட்சி சார்பில் போட்டியிடும் 6 வேட்பாளர்களில் முஸ்லிம் வேட்பாளராக நண்பர் ஆளுர் ஷாநவாஸ் போட்டியிடுகிறார். விடுதலை சிறுத்தைகள் கட்சி திமுக கூட்டணியில் இருந்தாலும் தம் கட்சி சார்பில் பானை சின்னத்தில், தனிச் சின்னத்தில் போட்டியிடுகிறார்கள்.

இவர்கள் தவிர்த்து முஸ்லிம் லீக் சார்பிலும் திமுக கூட்டணியில் முஸ்லிம் வேட்பாளர்கள் நிறுத்தப்பட்டுள்ளார்கள்.

இவற்றில் மமக வின் வேட்பாளர்கள் இருவரை பொருத்த வரையில் திமுக வின் உதய சூரியன் சின்னத்திலேயே இவர்களும் போட்டியிடுவதால் தேர்தலில் திமுக தனிப் பெரும்பான்மை பெற முடியாமல் போனால் திமுக வின் உறுப்பினர்களைப் போல் திமுகவுக்கு முழுமையாக கட்டுப்பட்டவர்களாக இவர்கள் இருவரும் செயல்பட வேண்டி வரும்.

ஆனால், ஏற்பட்டுள்ள மக்கள் எழுச்சியில் திமுக தனிப்பெரும்பான்மை வெற்றியை பெற வாய்ப்புள்ள காரணத்தினால் அப்படி தனிப்பெரும்பான்மை வெற்றி கிடைக்கும் என்றால் மமக வின் இரு வேட்பாளர்களும் வெற்றிபெரும் பட்சத்தில் சட்ட சபையில் தனித்தும் செயல்படும் வாய்ப்புண்டு.

எப்படிப் போனாலும் மோடியின் பஜக என்ற மனித குல விரோதிக்கும் அதிமுக என்ற மனித குல எதிரிக்கும் எதிராக திமுக, மமக கூட்டணியின் இந்த இரு வேட்பாளர்களும் நண்பர் ஷாநவாஸ் உள்ளிட்ட விடுதலை சிறுத்தைகளின் வேட்பாளர்களும் வெற்றி பெறுவது காலத்தின் கட்டாயமாக மாறியுள்ளது.

மொத்தத்தில் இம்முறை திமுக கூட்டணி வெற்றிபெறுவது மனித நேயம் பாதுகாக்கப்பட வழியாகும் என்பதில் மாற்றுக் கருத்தில்லை.

தமிழகத்தை இன்னொரு உத்தர பிரதேசமாக மாற்றி பச்சை பிள்ளை ஆசிபாவை கற்பழித்துக் கொலை செய்தது போல் தமிழகத்திலும் நடக்காமலிருக்க தமிழக மக்கள் குறிப்பாக முஸ்லிம்கள் திமுக கூட்டணிக்கு வாக்களிப்பது கட்டாய தேவையாக மாறியுள்ளது.

தற்போது திமுக கூட்டணியில் நிறுத்தப்பட்டுள்ள முஸ்லிம் வேட்பாளர்கள் கடந்த ஐந்து வருட ஆட்சியின் போது சட்ட சபையில் ஆளும், எதிர் கட்சிகளில் இருக்க வில்லை. இருப்பினும் தமிழகம் மட்டுமல்லாது இந்திய முஸ்லிம்களுக்காகவும் இவர்கள் ஓங்கி குரல் எழுப்பியதுடன், இலங்கை முஸ்லிம்களின் ஜனாஸா எரிப்பு அநியாயத்திற்கு எதிராக இலங்கைக்கு வெளியில் ஆரம்பமாகவே குரல் எழுப்பியவர்கள் தமுமுக வின் மமக வினர் என்பதும் இங்கு குறிப்பிடத் தக்கதாகும்.

ஜனாஸா அடக்கத்திற்கு வலியுறுத்தி, எரிப்பை நிறுத்துமாறு கோரி எஸ்.டி.பி.ஐ கட்சியினரும் அதே நாட்களில் ஆர்பாட்டங்களை நடத்தியிருந்தார்கள். என்பதும் இங்கு குறிப்பிட வேண்டிய ஒன்றாகும்.

தம் நாட்டுக்குள்ளும் வெளிநாட்டில் முஸ்லிம்களுக்கு ஏற்படும் இன்னல்களுக்காகவும் குரல் எழுப்பிய சகோதரர்கள் உள்ளிட்ட ஜனநாயக நேசம் கொண்ட மதச்சார்பற்ற திமுக கூட்டணியை வெற்றிபெறச் செய்வது காலத்தின் கட்டாயம் என்பது என் பார்வை.

தமிழக முஸ்லிம் அரசியல் சார்பற்ற இயக்கங்கள் பலவும் திமுக கூட்டணியை ஆதரித்துள்ளன. சகோதரர் அல்தாபி தலைமையிலான ஏகத்துவ முஸ்லிம் ஜமாஅத் போன்ற அமைப்புகள் இம்முறை இக்கூட்டணி வெற்றிக்காக களம் இறங்கி தேர்தல் பிரச்சாரங்களையும் மேற்கொண்டார்கள்.

அந்தளவுக்கு இந்தத் தேர்தல் மோடி மஸ்தான்களை விரட்டியடிக்க வேண்டிய சமூக நலன்சார் தேர்தலாக மாறியுள்ளது.

ஆட்சியை வழங்குபவனும், பரிப்பவனும் ஏக இறைவன் மாத்திரமே. நாளை தேர்தல் வாக்களிப்பின் பின் இறைவனின் நாட்டம் எதுவோ அதுவே நடக்கும்.
 
தான் நாடியோருக்கு அல்லாஹ் அதிகாரத்தை வழங்குவான். அல்லாஹ் தாராளமானவன்; அறிந்தவன்.
 
அல்குர்ஆன் 2:247
 
"அல்லாஹ்வே! ஆட்சியின் அதிபதியே! நீ நாடியோருக்கு ஆட்சியை வழங்குகிறாய். நீ நாடியோரிடமிருந்து ஆட்சியைப் பறித்துக் கொள்கிறாய். நாடியோரைக் கண்ணியப் படுத்துகிறாய். நாடியோரை இழிவுபடுத்துகிறாய். நன்மைகள் உன் கைவசமே உள்ளன. நீ அனைத்துப் பொருட்களின் மீதும் ஆற்றலுடையவன்'' என்று கூறுவீராக!
 
அல்குர்ஆன் 3:26