April 8, 2021

அநியாயமாக தடை விதித்தால் சட்டத்திற்கு முன் நீதி மன்றத்தில் நியாயம் கேட்போம்.


 
ஊடக அறிக்கை. - 07.04.2021


06 தவ்ஹீத் அமைப்புகள் உள்ளிட்ட 11 அமைப்புகளை இலங்கையில் தடை செய்வதற்கு சட்ட மா அதிபர் அனுமதி வழங்கியுள்ளதாக சட்ட மா அதிபர் தினைக்களம் அறிவித்துள்ளது.


குறித்த 11 அமைப்புகளில் கீழ்க்காணும்  06 தவ்ஹீத் அமைப்புகளும் உள்ளடங்கப்பட்டுள்ளன.


ஐக்கிய தௌஹீத் ஜமாஅத் (UTJ)
சிலோன் தௌஹீத் ஜமாஅத் (CTJ)
சிறிலங்கா தௌஹீத் ஜமாஅத் (SLTJ)
அகில இலங்கை தௌஹீத் ஜமாஅத் (ACTJ)
ஜம்இய்யதுல் அன்சாரி சுன்னத்துல் மொஹமதியா (JASM)
தாருல் அதர் - ஜாமிஉல் அதர் 


கடந்த 2019ம் ஆண்டு ஸஹ்ரான் ஹாஷிம் என்ற பயங்கரவாதி மேற்கொண்ட தற்கொலை குண்டுத் தாக்குதலை தொடர்ந்து எடுக்கப்பட்டு வரும் நடவடிக்கைகளில் ஒரு பகுதியாகவே சட்ட மா அதிபரின் இந்த பரிந்துரையும் அமைந்துள்ளது.


தற்கொலை குண்டுத் தாக்குதலில் பாதிக்கப்பட்டவர்களுக்கு நீதி வழங்க வேண்டும். என்பதில் எவ்வித மாற்றுக் கருத்தும் இல்லை. பாதிக்கப்பட்ட தொப்புல் கொடி உறவுகளான கிருஸ்தவ சகோதரர்களுக்கு நீதி கிடைக்க வேண்டும் என அரசாங்கத்தை விட முஸ்லிம் சமூகமே பெரும் எதிர்ப்பார்பில் இருக்கிறது. 


ஏப்ரல் 21ம் திகதிக்கு முன்னர் நீதி கிடைக்காவிட்டால் போராட்டதில் ஈடுபடவுள்ளதாக கர்தினால் மல்கம் ரஞ்சித் அறிவித்துள்ள இந்நிலையில் நீதியை பெற்றுத் தருகிறோம் எனும் பெயரில் குற்றத்துடன் எவ்வித தொடர்பும் அற்ற, மாபெரும் அழிவொன்று நடக்க இருக்கிறது என்று போதிய தகவல்களை உடனடியாக பாதுகாப்புத் துறைக்கு வழங்கிய CTJ உள்ளிட்ட தவ்ஹீத் அமைப்புகளை தடை செய்யவுள்ளதாக கூறுவது நீதியின் பெயரால் அநீதியை நிலைநாட்ட முனைவதாகும்.


சிலோன் தவ்ஹீத் ஜமாஅத் – CTJ என்பது ஜனநாயக ரீதியில் மக்கள் மத்தியில் பகிரங்கமாக இஸ்லாமிய பிரச்சாரம் மற்றும் சமூக பணிகளை முன்னெடுத்து வரக்கூடிய ஓர் அமைப்பாகும்.  நாடு முழுவதும் பயங்கரவாதத்திற்கு எதிராகவும், தீவிரவாதத்தை அடியோடு இல்லாமலாக்கவும் தொடர்ந்து பாடுபடும் ஓர் வெளிப்படைத் தன்மை கொண்ட ஜனநாயக அமைப்பாகும். 


எல்லாவற்றுக்கும் மேலாக சிலோன் தவ்ஹீத் ஜமாஅத் என்பது, 04/21 தற்கொலை குண்டுத் தாக்குதலுக்கு முன்பதாகவே பாதுகாப்புத் துறையுடன் ஒத்துழைப்பு வழங்கி ஸஹ்ரான் ஹாஷிமின் பயங்கரவாத செயல்பாடுகள் தொடர்பில் தகவல்களை வழங்கி பாதுகாப்பு தரப்புக்கு பூரண ஒத்துழைப்பை வழங்கிய ஓர் இயக்கமாகும்.


04/21 தாக்குதலின் பின்னால் நல்லாட்சி அரசு நியமித்த “பாராளுமன்ற தெரிவுக்குழு விசாரனை” மற்றும் அதன் பின்னால் முன்னால் ஜனாதிபதி மைத்திரிபால சிரிசேனவினால் நியமிக்கப்பட்டு தற்போதைய ஜனாதிபதியினால் கால நீட்டிப்பு செய்யப்பட்ட ஜனாதிபதி ஆணைக்குழு ஆகியவற்றில் சிலோன் தவ்ஹீத் ஜமாஅத் உள்ளிட்ட தவ்ஹீத் அமைப்புகளின் கொள்கைகள், செயல்பாடுகள், சமூக பணிகள் போன்றவற்றை ஆதாரங்களுடன் நாம் ஒப்புவித்துள்ளதுடன், பாதுகாப்புத் தரப்பின் அனைத்து பிரிவுகளுக்கும் நமது செயல்பாடுகள் தொடர்பில் முழு ஆதாரங்களையும் நாம் சமர்பித்துள்ள நிலையிலும் சட்ட மா அதிபரின் இந்த அறிவிப்பு அடிப்படையற்ற ஒன்றாகும். 


இந்நிலையில் 06 தவ்ஹீத் அமைப்புகள் உள்ளிட்ட 11 அமைப்புகளுக்கு தடை விதிக்க சட்ட மா அதிபர் அனுமதி வழங்கியுள்ளதாகவே ஊடக செய்திகள் தெரிவிக்கின்றன.


நேரடியாகவோ, மறைமுகமாகவோ தீவிரவாதத்தில் தொடர்பு கொண்டுள்ள அமைப்புகளை தடை செய்வதில் எமக்கு எவ்வித ஆட்சேபனையும் இல்லை. ஆனாலும், தீவிரவாதத்திற்கு நேர் எதிராக செயல்பட்ட அமைப்புகளை தடை செய்வதென்பது ஜனநாயக விரோத செயல்பாடாகும். 


சட்ட மா அதிபரின் அனுமதிக்கு பின், அரசு தடை பற்றிய கெஸட் – வர்த்தமானி அறிவிப்பை வெளியிட வேண்டும். வர்த்தமானி அறிவிப்பின் மூலம் தடை செய்ததாக அறிவிக்கப்படும் போது குறித்த இயக்கங்கள் செயல்பட முடியாமல் போகும். இதுவே பொதுவான சட்ட நடைமுறையாகும்.


நம்மை பொறுத்த வரையில் நாம் ஜனநாயக வழியில் தூய இஸ்லாத்தை பின்பற்றி, பிரச்சாரம் செய்து சமூக பணிகளை முன்னெடுக்கக் கூடிய ஓர் அமைப்பாகும் என்கிற வகையில் சட்ட ரீதியிலான ஜனநாயக வழிமுறைகளின் மூலம் நீதியை பெற்றுக் கொள்வதற்கான முயற்சிகளில் CTJ ஈடுபடவுள்ளது.


நீதி மன்றத்தில் சட்டத்தின் முன்னால் அநியாயம் தோற்று, நீதியும், நேர்மையும், உண்மையும் வெற்றிபெறும் என்பதில் எமக்கு எவ்வித ஐயமும் கிடையாது. 


ஏக இறைவன் அல்லாஹ் எம்முடன் என்றும் துணையிருப்பான் என்ற ஆழமான நம்பிக்கையில் நீதி மன்றை நாடுவோம். இன்ஷா அல்லாஹ்.


R. அப்துர் ராசிக் B.COM


பொதுச் செயலாளர்,


சிலோன் தவ்ஹீத் ஜமாஅத் - CTJ

April 5, 2021

தமிழக சட்டமன்ற தேர்தல் - மதச்சார்பற்ற திமுக கூட்டணி வெற்றிபெறுவது காலத்தின் கட்டாயம்; ஏன்?


 
இன்ஷா அல்லாஹ் நாளை ஏப்ரல் 06ம் திகதி தமிழக சட்டமன்ற தேர்தல் நடைபெறவுள்ளது.

தமிழக சட்ட மன்றத்திற்க்கான தேர்தல் கடந்த காலங்களை விட இம்முறை பல விதங்களில் முக்கியத்துவம் பெற்றுள்ளது.

மு. கருணாநிதி, ஜெ. ஜெயலளிதா என்ற இரண்டு துருவங்கள் இல்லாத தேர்தல் இது.

எடப்பாடி பழனிச்சாமி தலைமையிலான பெயரளவு அதிமுக ஆட்சியும் உண்மையான பஜக ஆட்சியும் நீட்சியை நோக்கி நகரும் தருணத்தில் வரும் தேர்தல் இது.

குறிப்பாக அதிமுக, மோடியின் பஜக, ராமதாசின் பாமக கட்டிகளின் பாசித மனிதகுல விரோத கூட்டணி ஒரு பக்கமும்,

ஸ்டாலின் தலைமையிலான தி.மு.க, கம்பியூனிஸ்டுகள், முஸ்லிம் சமுதாய கட்சிகளான தமுமுக வின் மனித நேய மக்கள் கட்சி, முஸ்லிம் லீக், மற்றும் தோழர் திருமாவளவன் தலைமையிலான விடுதலை சிறுத்தைகள் உள்ளிட்ட மதச் சார்பற்ற கூட்டணி மறுபக்கமும்,

சீமானின் நாம் தமிழர் கட்சி, டிடிவி தினகரனின் அமமுக மற்றும் விஜயகாந்தின் தேமுதிக, கமல்ஹாசனின் மக்கள் நீதி மையம் என ஏகப்பட்ட உதிரிக் கட்சிகளும் இன்னும் பெயர்களை எழுதி முடிக்க முடியாதளவுக்குண்டான கட்சிகளும் இம்முறை தமிழக சட்ட சபை தேர்தலில் களம் கண்டு பிரச்சாரத்தையும் முடித்து விட்டன.

இந்தத் தேர்தல் தமிழகத்துடன் சேர்த்து இன்னும் சில மாநிலங்களுக்கான மாநில தேர்தலாக நடைபெற்றாலும் தமிழக தேர்தல் பெரும் கவனத்தை ஈர்த்துள்ளது.

குறிப்பாக
மாட்டுக்காக மனிதனை கொல்வதையும்,
பெண்களை கற்பழிப்பதையும்,
மதத் தளங்களை அபகரிப்பதையும்,
மதத்தின் பெயரால் கலவரங்களை தூண்டுவதையும்,
ஜாதியின் பெயரால் சமூகங்களை பிளவுபடுத்துவதையும்,
ஆட்சிக்காக எந்த அநியாயத்தையும் செய்வதும், ஆதரிப்பதும் தான் நம் கடமை என அத்தனை அநியாயங்களுக்கும் துணை நிற்க்கும் உலக மகா கொடுங்கோலன், மனிதகுல விரோதி நரேந்திர மோடி தலைமையிலான பாரதிய ஜனதா கட்சி சார்ந்த மொத்த மனித குல விரோதிகளும் ஒரு பக்கமும்,

மனித நேய விரும்பிகளும், ஜனநாயகவாதிகளும் மறுபக்கமுமாக அமைந்துள்ள காரணத்தினால் தான் இந்தத் தேர்தல் மிகவும் முக்கியத்துவம் பெறுகிறது.

இம்முறை திமுக கூட்டணியில் மமக, முஸ்லிம் லீக் உள்ளிட்ட முஸ்லிம் கட்சிகள் இணைந்து போட்டியிடுகின்றன. மமக சார்பில் பேராசிரியர் ஜவாஹிருல்லாஹ் மற்றும் ப. அப்துஸ் சமத் ஆகியோர் திமுக வின் உதய சூரியர் சின்னத்திலேயே போட்டியிடுகிறார்கள்.

திமுக கூட்டணியில் அங்கம் வகிக்கும் விடுதலை சிறுத்தைகள் கட்சி சார்பில் போட்டியிடும் 6 வேட்பாளர்களில் முஸ்லிம் வேட்பாளராக நண்பர் ஆளுர் ஷாநவாஸ் போட்டியிடுகிறார். விடுதலை சிறுத்தைகள் கட்சி திமுக கூட்டணியில் இருந்தாலும் தம் கட்சி சார்பில் பானை சின்னத்தில், தனிச் சின்னத்தில் போட்டியிடுகிறார்கள்.

இவர்கள் தவிர்த்து முஸ்லிம் லீக் சார்பிலும் திமுக கூட்டணியில் முஸ்லிம் வேட்பாளர்கள் நிறுத்தப்பட்டுள்ளார்கள்.

இவற்றில் மமக வின் வேட்பாளர்கள் இருவரை பொருத்த வரையில் திமுக வின் உதய சூரியன் சின்னத்திலேயே இவர்களும் போட்டியிடுவதால் தேர்தலில் திமுக தனிப் பெரும்பான்மை பெற முடியாமல் போனால் திமுக வின் உறுப்பினர்களைப் போல் திமுகவுக்கு முழுமையாக கட்டுப்பட்டவர்களாக இவர்கள் இருவரும் செயல்பட வேண்டி வரும்.

ஆனால், ஏற்பட்டுள்ள மக்கள் எழுச்சியில் திமுக தனிப்பெரும்பான்மை வெற்றியை பெற வாய்ப்புள்ள காரணத்தினால் அப்படி தனிப்பெரும்பான்மை வெற்றி கிடைக்கும் என்றால் மமக வின் இரு வேட்பாளர்களும் வெற்றிபெரும் பட்சத்தில் சட்ட சபையில் தனித்தும் செயல்படும் வாய்ப்புண்டு.

எப்படிப் போனாலும் மோடியின் பஜக என்ற மனித குல விரோதிக்கும் அதிமுக என்ற மனித குல எதிரிக்கும் எதிராக திமுக, மமக கூட்டணியின் இந்த இரு வேட்பாளர்களும் நண்பர் ஷாநவாஸ் உள்ளிட்ட விடுதலை சிறுத்தைகளின் வேட்பாளர்களும் வெற்றி பெறுவது காலத்தின் கட்டாயமாக மாறியுள்ளது.

மொத்தத்தில் இம்முறை திமுக கூட்டணி வெற்றிபெறுவது மனித நேயம் பாதுகாக்கப்பட வழியாகும் என்பதில் மாற்றுக் கருத்தில்லை.

தமிழகத்தை இன்னொரு உத்தர பிரதேசமாக மாற்றி பச்சை பிள்ளை ஆசிபாவை கற்பழித்துக் கொலை செய்தது போல் தமிழகத்திலும் நடக்காமலிருக்க தமிழக மக்கள் குறிப்பாக முஸ்லிம்கள் திமுக கூட்டணிக்கு வாக்களிப்பது கட்டாய தேவையாக மாறியுள்ளது.

தற்போது திமுக கூட்டணியில் நிறுத்தப்பட்டுள்ள முஸ்லிம் வேட்பாளர்கள் கடந்த ஐந்து வருட ஆட்சியின் போது சட்ட சபையில் ஆளும், எதிர் கட்சிகளில் இருக்க வில்லை. இருப்பினும் தமிழகம் மட்டுமல்லாது இந்திய முஸ்லிம்களுக்காகவும் இவர்கள் ஓங்கி குரல் எழுப்பியதுடன், இலங்கை முஸ்லிம்களின் ஜனாஸா எரிப்பு அநியாயத்திற்கு எதிராக இலங்கைக்கு வெளியில் ஆரம்பமாகவே குரல் எழுப்பியவர்கள் தமுமுக வின் மமக வினர் என்பதும் இங்கு குறிப்பிடத் தக்கதாகும்.

ஜனாஸா அடக்கத்திற்கு வலியுறுத்தி, எரிப்பை நிறுத்துமாறு கோரி எஸ்.டி.பி.ஐ கட்சியினரும் அதே நாட்களில் ஆர்பாட்டங்களை நடத்தியிருந்தார்கள். என்பதும் இங்கு குறிப்பிட வேண்டிய ஒன்றாகும்.

தம் நாட்டுக்குள்ளும் வெளிநாட்டில் முஸ்லிம்களுக்கு ஏற்படும் இன்னல்களுக்காகவும் குரல் எழுப்பிய சகோதரர்கள் உள்ளிட்ட ஜனநாயக நேசம் கொண்ட மதச்சார்பற்ற திமுக கூட்டணியை வெற்றிபெறச் செய்வது காலத்தின் கட்டாயம் என்பது என் பார்வை.

தமிழக முஸ்லிம் அரசியல் சார்பற்ற இயக்கங்கள் பலவும் திமுக கூட்டணியை ஆதரித்துள்ளன. சகோதரர் அல்தாபி தலைமையிலான ஏகத்துவ முஸ்லிம் ஜமாஅத் போன்ற அமைப்புகள் இம்முறை இக்கூட்டணி வெற்றிக்காக களம் இறங்கி தேர்தல் பிரச்சாரங்களையும் மேற்கொண்டார்கள்.

அந்தளவுக்கு இந்தத் தேர்தல் மோடி மஸ்தான்களை விரட்டியடிக்க வேண்டிய சமூக நலன்சார் தேர்தலாக மாறியுள்ளது.

ஆட்சியை வழங்குபவனும், பரிப்பவனும் ஏக இறைவன் மாத்திரமே. நாளை தேர்தல் வாக்களிப்பின் பின் இறைவனின் நாட்டம் எதுவோ அதுவே நடக்கும்.
 
தான் நாடியோருக்கு அல்லாஹ் அதிகாரத்தை வழங்குவான். அல்லாஹ் தாராளமானவன்; அறிந்தவன்.
 
அல்குர்ஆன் 2:247
 
"அல்லாஹ்வே! ஆட்சியின் அதிபதியே! நீ நாடியோருக்கு ஆட்சியை வழங்குகிறாய். நீ நாடியோரிடமிருந்து ஆட்சியைப் பறித்துக் கொள்கிறாய். நாடியோரைக் கண்ணியப் படுத்துகிறாய். நாடியோரை இழிவுபடுத்துகிறாய். நன்மைகள் உன் கைவசமே உள்ளன. நீ அனைத்துப் பொருட்களின் மீதும் ஆற்றலுடையவன்'' என்று கூறுவீராக!
 
அல்குர்ஆன் 3:26  

March 22, 2021

இலங்கையில் புர்கா தடை : CTJ யின் நிலைபாடு என்ன? - BBC செய்தி



புர்கா தடை விடயம் தொடர்பில் சிலோன் தவ்ஹீத் ஜமாஅத் அமைப்பின் துணைத் தலைவர் ரஸ்மின், பிபிசி தமிழிடம் தெரிவித்தார்.


புர்காவிற்கு தடை விதிக்கப்படும் என பொதுமக்கள் பாதுகாப்பு அமைச்சர் சரத் வீரசேகர அறிவித்ததை அடுத்து, பாகிஸ்தான் உயர்ஸ்தானிகர் ட்விட்டர் பதிவொன்றை வெளியிட்டிருந்ததாக ரஸ்மின் குறிப்பிடுகின்றார்.


புர்கா அணிவது தமது மார்க்கத்தில் தடை செய்யப்பட்ட ஒன்று என கூறும் ரஸ்மின், புர்காவிற்கு இலங்கை அரசாங்கம் தடை விதிப்பதை ஒரு இஸ்லாமிய சமூகமாக தங்களால் ஏற்றுக்கொள்ள முடியாது என குறிப்பிட்டுள்ளார். 

இஸ்லாமிய மார்க்கத்தில் முகத்திரை அணிவது தடை செய்யப்பட்ட ஒன்று எனவும் அவர் கூறுகிறார்.


முகத்திரை அணிவது என்பது நபிகள் நாயகத்தின் மனைவிகளுக்கு மாத்திரம் உள்ள சட்டம் எனவும் அவர் தெரிவித்துள்ளார்.


இந்த விடயத்தை தாம் விழிப்புணர்வின் ஊடாக மக்களிடையே தெளிவூட்டுவதாகவும் அவர் குறிப்பிடுகிறார்.


எனினும், அரசாங்கம் இவ்வாறான சட்டங்களை கொண்டு வருவதை தாம் ஆதரிக்க முயற்சிக்கும் போது, நாளை மேலும் பல்வேறு விடயங்களுக்கு தடை ஏற்படுத்த வாய்ப்புள்ளதாகவும் ரஸ்மின் கூறுகிறார்.

BBC செய்தி:
https://www.bbc.com/tamil/sri-lanka-56480282


புர்கா தடை பற்றிய CTJ நிலைபாடு வீடியோ :

பஜ்ருக்கு முன் பயணம் செய்யும் போது, பஜ்ரு தொழுகையை முற்கூட்டி தொழ அனுமதியுண்டா?


 

பொதுவாக தொழுகைகளை அதற்கான நேரம் வருவதற்கு முன் தொழக் கூடாது என்றாலும் தொழுகை நேரம் வருவதற்கு முன் பயணம் மேற்கொள்ள வேண்டிய நிலையில் நேரம் வருவதற்கு முன்னர் தொழ அனுமதியுள்ளது.

பயண நேரங்களில் நபிகள் நாயகம் (ஸல்) அவர்கள் வைகறைப் பொழுது வருவதற்கு முன்பே இருட்டில் தொழுதுள்ளார்கள். இதைப் பின்வரும் ஹதீஸ்கள் தெளிவுபடுத்துகின்றன.

 371حَدَّثَنَا يَعْقُوبُ بْنُ إِبْرَاهِيمَ قَالَ حَدَّثَنَا إِسْمَاعِيلُ بْنُ عُلَيَّةَ قَالَ حَدَّثَنَا عَبْدُ الْعَزِيزِ بْنُ صُهَيْبٍ عَنْ أَنَسِ بْنِ مَالِكٍ أَنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ غَزَا خَيْبَرَ فَصَلَّيْنَا عِنْدَهَا صَلَاةَ الْغَدَاةِ بِغَلَسٍ فَرَكِبَ نَبِيُّ اللَّهِ صَلَّى اللَّهُ عَلَيْهِ وَسَلَّمَ رواه البخاري

அனஸ் (ரலி) அவர்கள் கூறினார்கள் :

அல்லாஹ்வின் தூதர் (ஸல்) கைபர் மீது (ஹிஜ்ரி 7ஆம் ஆண்டு) போர் தொடுத்தார்கள். (அந்தப் போரின் போது) கைபருக்கு அருகில் (அதன் புறநகரில்) நாங்கள் (கடைசி இரவின்) இருட்டிலேயே  வைகறைத் தொழுகையைத் தொழுதோம். பிறகு அல்லாஹ்வின் தூதர் (ஸல்) அவர்கள் (தமது வாகனத்தில் ஏறி) பயணமானார்கள்.

நூல் : புகாரி 371

2270 حَدَّثَنَا يَحْيَى بْنُ يَحْيَى وَأَبُو بَكْرِ بْنُ أَبِي شَيْبَةَ وَأَبُو كُرَيْبٍ جَمِيعًا عَنْ أَبِي مُعَاوِيَةَ قَالَ يَحْيَى أَخْبَرَنَا أَبُو مُعَاوِيَةَ عَنْ الْأَعْمَشِ عَنْ عُمَارَةَ عَنْ عَبْدِ الرَّحْمَنِ بْنِ يَزِيدَ عَنْ عَبْدِ اللَّهِ قَالَ مَا رَأَيْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ صَلَّى صَلَاةً إِلَّا لِمِيقَاتِهَا إِلَّا صَلَاتَيْنِ صَلَاةَ الْمَغْرِبِ وَالْعِشَاءِ بِجَمْعٍ وَصَلَّى الْفَجْرَ يَوْمَئِذٍ قَبْلَ مِيقَاتِهَا و حَدَّثَنَا عُثْمَانُ بْنُ أَبِي شَيْبَةَ وَإِسْحَقُ بْنُ إِبْرَاهِيمَ جَمِيعًا عَنْ جَرِيرٍ عَنْ الْأَعْمَشِ بِهَذَا الْإِسْنَادِ وَقَالَ قَبْلَ وَقْتِهَا بِغَلَسٍ رواه مسلم

அப்துல்லாஹ் பின் மஸ்ஊத் (ரலி) அவர்கள் கூறினார்கள் :

அல்லாஹ்வின் தூதர் (ஸல்) அவர்கள் (ஹஜ் பயணத்தில்) எந்தத் தொழுகையையும் அதற்குரிய நேரத்தில் அல்லாமல் வேறு நேரத்தில் தொழுததை நான் பார்த்ததில்லை; இரண்டு தொழுகைகளைத் தவிர. ஒன்று: முஸ்தலிஃபாவில் மஃக்ரிபையும், இஷாவையும் (சேர்த்துத்) தொழுதது. மற்றொன்று: அன்றைய (மறு) நாள் ஃபஜ்ர் தொழுகையை அதற்குரிய (வழக்கமான) நேரத்திற்கு முன்னரே (முஸ்தலிஃபாவில்) தொழுதது.

மேற்கண்ட ஹதீஸ் மேலும் இரு அறிவிப்பாளர் தொடர்கள் வழியாகவும் வந்துள்ளது.

அவற்றில் "ஃபஜ்ர் தொழுகையை அதற்குரிய நேரத்திற்கு முன் இருட்டிலேயே தொழுதது'' என இடம்பெற்றுள்ளது.

நூல் : முஸ்லிம் 2479

எனவே ஃபஜர் தொழுகையைச் சற்று முன்னதாகவே இருளில் தொழுவதற்கு அனுமதியுள்ளது. குறிப்பாக பயணத்தில் இவ்வாறு தொழுதால் அதில் தவறேதுமில்லை.

onlinepj

November 25, 2020

மாடறுப்புக்கு தடை வந்தால்....? விக்டர் ஐவன் அவர்களின் ஆய்வுக் கட்டுரை



மாடறுப்புக்கு தடை வேண்டுமென கோரி 2013இல் தலதா மாளிகைக்கு முன்னால் தேரர் ஒருவர் தற்கொலை செய்து கொண்ட பரபரப்பான சூழலில் “ராவய” பத்திரிக்கை ஆசிரியர் விக்டர் ஐவன் அவர்கள் எழுதிய ஆக்கத்தை இங்கு பதிவிடுகிறோம்.


கடந்த வெசாக் பௌர்ணமி தினத்தன்று தலதா மாளிகைக்கு முன்னால் தனக்குத்தானே தீமூட்டிக் கொண்டு இந்திர ரத்ன தேரர் தற்கொலை செய்து கொண்ட சம்பவத்தை நாம் அனைவரும் அறிவோம். நான்கு கோரிக்கைகளுடன், குறிப்பாக மிருகவதையை முன்வைத்து மாடறுப்பது இங்கு தடை செய்யப்பட வேண்டும் என்று தீக்குளித்து உயிரை மாய்த்துக் கொண்டார்.

இவரதும் இவர் போன்றும் மாடு அறுப்பதற்கு எதிராகக் கூக்குரலிடுவோரின் கோரிக்கை அமுலாக்கப்படுமானால் நாடு மிகவும் பாரியதொரு பொருளாதார நெருக்கடிக்கு முகம்கொடுக்க வேண்டிய நிலைக்குத் தள்ளப்படும். அத்துடன் வேலையில்லாப் பிரச்சினை மேலும் விஸ்வரூபம் எடுக்கவும் அது வழிவகுத்து விடும்.

இவற்றினை வைத்து நாம் சிறிது அலசிப் பார்ப்போம்.

ஜீவகாருண்யம் என்ற போர்வையிலேயே மாடுகள் அறுக்கப்படுவதைத் தடை செய்யக் கோரிக்கை விடுக்கிறார்கள். அப்படிப் பார்த்தால் நாட்டைச்சூழ மீன் பிடிக்கிறார்கள், ஆடு, கோழிகள் அறுக்கப்படுகின்றன. ஏன் நாட்டில் மிகவும் பெரும்பாலானோர்களால் கோழி, முட்டை உணவாகக் கொள்ளப்படுகிறது. பொதுவாக சகல இன, மதத்தவர்களாலும் கோழி இறைச்சியும் முட்டையும் உணவில் பிரதான பங்கு வகிக்கின்றன.

கோழியும் மாட்டைப்போன்று உயிருள்ள ஒரு பிராணி. அது வெட்டப்பட்ட பின் துடிக்கும் காட்சியை நாம் அனைவரும் நன்கறிவோம். இப்படி இருந்தும் ஏன் அதற்கெதிராக குரல் கொடுப்பதில்லை.

பெரும்பாலான மதகுருக்கள் உட்பட சகல மதத்தவர்களும் போல கோழியையும் முட்டையையும் பல வழிகளிலும் உணவாகப் பயன்படுத்துகிறார்கள். சில சந்தர்ப்பங்களில் முட்டைக்குத் தட்டுப்பாடு நிலவும் போது வெளிநாடுகளில் இருந்தும்கூட இறக்குமதி செய்து தேவையைப் பூர்த்தி செய்கிறார்கள்.

எனவே, ஜீவ காருண்யம் என்று கோழிகள் அறுப்பதைத் தடை செய்தால் நாட்டில் எத்தனை கோழிப் பண்ணைகள், எத்தனை ஆயிரம் பேர் அதன் மூலம் பொருளாதார ரீதியாக சீவிக்கிறார்கள் என்பதை சிந்தித்துப் பாருங்கள்.

அதேபோன்றுதான் நாட்டில் பரவலாக பசுப் பண்ணைகள் இருந்து வருகின்றன. நாட்டின் பால் தேவையைப் பூர்த்தி செய்ய முடியாத நிலையில் பலதரப்படட பால்மா வகைகள் இறக்குமதி செய்யப்படுகின்றன.

இந்நாட்டிலுள்ள குறிப்பிட்ட பௌத்தர்களும் இந்துக்களும் மாமிச உணவுகள் பரிமாறப்படாவிட்டாலும் பால் வகைகள், முட்டை சேர்ந்த உணவுகளை உட்கொள்வதைக் காண்கின்றோம். அல்லது ஆட்டிறைச்சி, கோழி இறைச்சியை உண்ணும் பௌத்த இந்துக்களும் இருக்கவே செய்கின்றார்கள். ஏன் இவர்கள் மாட்டிறைச்சியை மட்டும் தூக்கிப் பிடிக்க வேண்டும்?

நாட்டின் பால் தேவைக்காக தினம் பசுவொன்று 20-25 லீற்றர் பால் தரக்கூடிய ரக பசுக்கள் கொண்ட பால் பண்ணை அமைய வேண்டும். பால் பண்ணையோடு மேய்ச்சல் புல் வெளியும் தொடர்பு படுகிறது. இவையும் தொழில், பொருளாதாரத் துறைகளில் பங்கு வகிக்கின்றன. நல்ல ரக பசு ஒன்று ஒரு இலட்சம் முதல் இரண்டு இலட்சம் ரூபா பெறுமதிவாய்ந்ததாகும்.

மூன்று வருடங்களின் பின்பே பசு கன்று ஈன்று பால்தரும் நிலையை அடைகின்றது. அது சுமார் 7 வருடங்கள் வரை பயன்பாடுடையதாக அமையும். அதன்பின் மாடு அறுப்புத் தடை வந்தால் பால் எடுப்பது நிறுத்தப்பட்டபின் குறித்த பசுவை, பசுக்களை அப்படியே விட்டு விட்டால் அவற்றுக்கான மேய்ச்சல் நிலம், உணவுப் பிரச்சினை, இட நெருக்கடியால் பண்ணையாளர் மண்ணைத்தான் கவ்வ வேண்டிவரும்.

சுமார் ஒன்று இரண்டு லட்சம் ரூபாவுக்கு வாங்கிய பசு, பால் பயன்பாடு தீர்ந்த பின் இறைச்சிக்காக விற்கப்படுமாயின் 500 கிலோ எடையுடையதாக வைத்துக் கொண்டால் கிட்டத்தட்ட ஒரு லட்சம் ரூபாவுக்கு விற்பனை செய்யலாம். பால் பண்ணையாளரின் இலாபம் இதிலேதான் தங்கியிருக்கிறது. மாடு அறுப்பது தடைசெய்யப்பட்டால் நாட்டில் பால பண்ணைகள் கூட இழுத்து மூட வேண்டித்தான் வரும் என்பது உறுதி.

மாட்டிறைச்சியை விரும்பாத இந்துக்களைப் பெரும்பான்மையாகக் கொண்ட இந்தியாவில் கூட பால் பண்ணைகள் இலாபத்திலும் சிறப்பாகவும் இயங்க அங்கு வாழும் 177 மில்லியன் முஸ்லிம்கள் இறைச்சியை உணவாகக் கொள்வதே பிரதான காரணமாகும்.

உலகில் தாவரங்கள் உட்பட சகல உயிரினங்களும் உயிர் வாழ புரதம் இன்றியமையாததாகும். அமினோ அமிலங்களின் சேர்க்கையே புரத உற்பத்திக்கு காரணியாகும். தாவர இலைகள் காற்று, சூரிய ஒளி மூலம் தம் உணவைத் தயாரித்துக் கொள்கின்றன.

ஏனைய உயிரினங்கள் அமினோ அமிலத்தினை உட்கொள்ளும் உணவு மூலம் பெற்றுக் கொள்கின்றன. 10 வகையான அமினோ அமிலங்கள் அடங்கிய உணவே நிறைவான புரத உணவாகக் கொள்ளப்படுகிறது. தாவர உணவு வகைகளில் இரண்டொரு அமினோ அமிலங்களே காணப்படுகின்றன. ஆனால் மாமிச உணவுகளிலே தான் 10 வகை அமினோ அமிலங்களும் அடங்கியிருப்பதாக வைத்திய விஞ்ஞானம் கூறுகின்றது. எமது உடலில் நீருக்கு அடுத்தபடியாக அதிகமாக இருப்பது புரதமேயாகும்.

எனவே, இறைச்சி உண்பதைத் தடுக்க பிரசாரம் செய்வோர் தம் இனத்தைப் பலவீனப்படுத்தி நோயாளியாக்கவே வழி வகுக்கிறார்கள் என்றால் மிகையாகாது.

ஆதிகால சிங்களவர்கள் பலசாலிகளாக இருந்து பாரமான கருங்கற்களைச் சுமந்து மிகப் பெரிய குளங்கள் வாவிகளை அமைத்திருக்கிறார்கள். அவர்கள் மாமிசம் உண்டதனாலே தான் இவ்வாறு பலம் பெற்றிருக்கிறார்கள்.

குறித்த குளங்களில் மீன் வளர்த்து உணவாகப் பெற்றிருக்கிறார்கள், கண்ணி வைத்தும் வேட்டையாடியும் மரை, மான்கள், காட்டுப் பன்றிகளைப் புசித்திருக்கிறார்கள். தமது வேட்டைப் பொருட்களில் ஒரு பகுதியை விகாரைகளுக்கும் பங்கு வைத்திருக்கிறார்கள். அரச மாளிகைக்குக் கூட வேட்டையாடிய இறைச்சியை விநியோகித்திருக்கிறார்கள்.

மகிந்த தேரர் இலங்கை வந்து தேவநம்பிய திஸ்ஸ மன்னனைச் சந்தித்த சந்தர்ப்பத்தில் அவர் வேட்டையாடிய இறைச்சியை சாப்பிட்டுக் கொண்டிருந்ததாக மகாவம்சத்தில் பதிவாகியிருக்கிறது. மன்னன் பௌத்த தர்மத்தைத் தழுவிய பின்னரும் வேட்டையாடியதைக் கைவிட்டதாக வரலாற்றில் அறிய முடியவில்லை.

கி.பி. 1153 முதல் 1185 வரை ஆட்சிபுரிந்த சிரேஷ்ட பௌத்த மன்னனாக மதிக்கப்படும் முதலாவது பராக்கிரமபாகு மன்னன் அவரது மகாராணி உட்பட அரச அதிகாரிகளுடன் மான், மரை வேட்டைக்குச் சென்றதாக சூலவங்ஸவில் குறிப்பிட்டிருக்கிறது.

உலகில் 79 மில்லியன் தமிழர்கள் வாழ்கிறார்கள். அதனால் இங்கு 30 வருடங்கள் இனப்போர் வெடித்து நாடு அதளபாதாளத்தில் வீழ்ந்தது.

ஆனால், உலகில் 1619 மில்லியன் முஸ்லிம்கள் வாழ்கின்றார்கள். 50 மேற்பட்ட முஸ்லிம் நாடுகள் உலகில் இருக்கின்றன. இப்போதுள்ள நிலையில் சிங்கள முஸ்லிம் முறுகல் நிலை உக்கிரமடையுமாயின் பாரதூர விளைவுகளை நினைத்தும் பார்க்க முடியாதென்ற உண்மையும் மறுப்பதற்கில்லை.

இனவாத ரீதியாக மாடறுப்பது உட்பட எழும் முஸ்லிம் விரோத செயற்பாடுகளைத் தூண்டுவோர் இதனை உணர வேண்டும்.

சிங்களத்தில்: விக்டர் ஐவன்
தமிழில்: ஏ.எல்.எம்.சத்தார்