September 9, 2021

முஸ்லிம் காதி நீதிமன்ற முறை ஒழிக்கப்படப் போகிறது - இறுதியில் என்னதான் மிஞ்சப் போகிறதோ? நம் தலைவர்கள் எங்கே?




ஆங்கிலேயே ஆட்சிக் காலம் தொட்டு சமூகத்தின் எதிர்காலத்தை கருத்திற் கொண்டு ஆங்கிலேயே அரசுடனேயே போராடிப் போராடி தனித்துவமான பல உரிமைகளை இந்த சமூகத்திற்காக நம் முன்னோர்கள் பெற்றுத் தந்தார்கள்.

இஸ்லாமிய மார்க்கத்தை பின்பற்றுவதற்கான மத சுதந்திரம்,

வணக்கத் தளங்களை அமைத்துக் கொள்வதற்கான சுதந்திரம்,

முஸ்லிம் கலாசார பின்னனியுடனான தனித்துவமான பாடசாலைகள்,

ஆடை முறையை பின்பற்றும் சுதந்திரம் என நாம் இன்று அனுபவிக்கும் அனைத்து சுதந்திரங்களையும் போராடிப் போராடி பெற்றுத் தந்தார்கள்.

குறிப்பாக முஸ்லிம் குடும்ப வாழ்வியலை மார்க்க அடிப்படையில் தீர்மானிக்க வேண்டும் என்பதற்காக அன்றிருந்த நம் முன்னோர்களின் மார்க்க ஞானத்திற்கு உட்பட்டு முஸ்லிம் விவாக, விவாகரத்து சட்ட மூலத்தையும் உருவாக்கினார்கள்.

முஸ்லிம் தனியார் சட்டம் என்று அறியப்படும் இந்த சட்ட மூலத்தின்படி முஸ்லிம்கள் திருமணம், விவாகரத்து, சொத்துப் பங்கீடு போன்றவற்றை நம் மார்க்க வழிகாட்டல் அடிப்படையில் செயல்படுத்திக் கொள்வதற்கு இச்சட்டமூலம் வழி செய்கிறது.

இன்று நடப்பது என்ன?

கடந்த இரண்டு நாட்களுக்கு முன்னர் தனியார் சமூக வலைதள ஊடகமொன்றுக்கு கருத்து வெளியிட்டுள்ள நீதி அமைச்சர் அலி சப்ரி காதி நீதிமன்றங்கள் ஒழிக்கப்படும் என்றும் பொது நீதிமன்றங்களில் குடும்பப் பிரச்சினைகளை தீர்த்துக் கொள்ள வேண்டும் என்றும் தெரிவித்துள்ளார்.

இதற்காக இப்போது அலி சப்ரியை திட்டித் தீர்ப்பதில் எந்தவொரு தீர்வும் கிடைக்கப் போவதில்லை. இன்று ஏற்பட்டுள்ள இந்நிலைக்குறிய காரணம் யார் என்ன பின்னனி? என்பதை நாம் கொஞ்சம் மீட்டிப் பார்க வேண்டும். அப்போது தெரியும் இந்த அநியாயத்திற்கு உண்மையில் யார் பொறுப்பு என்பது.

நாங்கள் தான் இந்த சமூகத்தின் தலைவர்கள் எனக்கூறிக் கொண்டுள்ள ஒரு கூட்டத்தின் வரட்டுப் பிடிவாதம் தான் இத்தனை நாசத்திற்கும் காரணம் என்றால் மறுக்க முடியுமா?

இன்று இத்தனை அழிவுகள் நடந்தும் அந்தத் தலைவர்கள் ? எவறும் எதற்கும் வாய் திறப்பதாக தெரியவில்லை. அவர்கள் நாட்டில் இருக்கிறார்களா? என மக்கள் கேட்க்கும் அளவுக்குத் தான் நிலைமை இருக்கிறது.

ஆம், முஸ்லிம் தனியார் சட்ட திருத்தம் மற்றும் அதன் முக்கிய சம்பவங்களை சிலதை இங்கு சுட்டிக்காட்ட விரும்புகிறேன்.

கடந்த 2009ம் ஆண்டு காலப்பகுதியில் மஹிந்த ராஜபக்ஷ அவர்களின் ஆட்சிக் காலத்தில் அப்போதைய நீதி அமைச்சர் மிலிந்த மொரகொட அவர்கள் முஸ்லிம் தனியார் சட்டத்தில் தேவையான திருத்தங்களை கொண்டுவருவதற்காக ஒரு குழுவை அமைத்தார். முன்னால் நீதியரசர் சலீம் மர்சூப் தலைமையிலான அந்தக் குழு தனியார் சட்ட திருத்தங்களை சமூக மட்டத்தில் கலந்துரையாடி முன்வைக்கும் என கூறப்பட்டது.

    இங்கு கவனிக்க வேண்டிய முக்கிய விவகாரம் என்னவென்றால் மிலிந்த மொரகொட குறித்த குழுவை நியமிக்கும் போது தேசிய மட்டத்தில் முஸ்லிம் தனியார் சட்டம் ஒரு பிரச்சினைக்குறியதாகவோ, சர்சைக்குறியதாகவோ இருக்கவில்லை. மிக அழகாக திருத்தங்களை குர்ஆன் சுன்னா அடிப்படையில் கொண்டுவந்து அழகிய முறையில் முடிவு கண்டிருக்கலாம். சட்டமும் பாதுகாக்கப்பட்டிருக்கும்.

ஆனால் நம் தலைமைகள் ? என கூறிக்கொண்டிருப்போர் அதற்கு விரும்பவில்லை. மூக்கிருக்கும் வரைதான் சலியும் இருக்கும் என்று சொல்வதைப் போல் பிரச்சினைகள் இருந்தால் தானே தலைவர்களும் இருக்க முடியும் என்கிற மொக்கை தத்துவத்தை உண்மையென நம்பிக் கொண்டு பிரச்சினையை தொடர விட்டார்கள்.

நீதியரசர் சலீம் மர்சூப் அவர்களை பொறுத்தவரையில் நாம் அறிந்து இந்த சட்டத் திருத்தத்தை எப்படியாவது சரியாக நிறைவேற்றிவிட வேண்டும் என்பதில் அதிக கரிசனை காட்டிய ஒருவர் என்பதை மறுக்க முடியாது. சமூகத்தின் அனைத்துத் தரப்பினரிடமிருந்தும் பரிந்துரைகள், கருத்துக்களை பெற்றுக் கொண்டு இரண்டு மூன்று ஆண்டுகளுக்கு முன்பதாகவே கிட்டத்தட்ட நூற்குக்கு 80 சதவீதத்திற்கும் மேல் திருத்தத்தை நிறைவு செய்திருந்தார்.

ஆனாலும் திருத்த சட்டமூலத்தை பாராளுமன்றில் சமர்பித்து முடிவு காண முடியவில்லை.

என்ன காரணம்? சமூக மட்டத்தில் கலந்துரையாடி திருத்த சட்டம் ஓரளவுக்கு செய்யப்பட்டிருந்தாலும் நம் சமூகத் தலைமைகள் ? என சொல்லிக் கொள்ளும் ஒரு சிலரின் வரட்டுப் பிடிவாதமும், மார்க்கத்தை அறிந்து கொள்ளாத தன்மையும் இன்று காதி நீதிமன்றங்களே ஒழிந்து போகும் அளவுக்கு கொண்டு வந்து விட்டு விட்டது.

ஆம், முஸ்லிம் தனியார் சட்டம் நபி வழி அடிப்படையில் அமைய வேண்டும் என கூறியிருக்க வேண்டிய  அகில இலங்கை ஜம்மிய்யதுல் உலமா சபை, தனியார் சட்டம் ஷாபி மத்ஹபுக்கு மாற்றமாக வந்து விடக்கூடாது என்பதில் விடாப்பிடியாக இருந்தது. இன்றும் இருக்கிறது.

தாம் ஏற்றுக்கொண்டுள்ள ஓர் மத்ஹபுக்கு கொடுத்த முக்கியத்துவத்தை நபிவழிக்கு கொடுத்திருந்தால் இன்று இந்த அவலம் வந்திருக்குமா?

இன்னொரு சாரார், இல்லையில்லை, திருத்தம் ஹனபி மத்ஹபுப்படிதான் அமைய வேண்டும் என்று ஒற்றைக் காலில் நின்றார்கள்.

முஸ்லிம்களுக்கான குடும்பவியல் சட்டம் நபியவர்களின் வழிகாட்டலில் அமைந்து விடக் கூடாது எங்கள் மத்ஹபுகளின் வழியில் தான் அமைய வேண்டும் என்ற இவர்களின் வரட்டுப் பிடிவாதம் இன்று காதி நீதிமன்றங்களே இல்லையென்ற இடத்தில் கொண்டு வந்து நிறுத்தி விட்டது.

சில பெண்ணியலாளர்கள், பெண்களுக்கு உரிமை வேண்டும் என்று கேட்ட சகோதரிகளின் கோரிக்கைகளை நபி வழி அடிப்படையில் ஐந்து நிமிடம் அலசிப் பார்ப்பதற்குக் கூட இவர்கள் விரும்பவில்லை.

நீங்கள் யார் கருத்து சொல்வதற்கு? என தமக்கு மாற்றுக் கருத்துக் கூறிய அனைவரையும் அன்றும் இன்றும் தூக்கியெறிந்து நான் என்ற மமதையில் ஆடியதின் விளைவை இன்று முழு சமூகமும் சுமக்க வேண்டியுள்ளது.

பெண்களுக்கு உரிமை வேண்டும் என கோரியவர்கள் முன்வைத்த கோரிக்கைகளில் மார்க்கத்திற்கு முரனான கோரிக்கைகளும் உண்டு மார்க்கத்திற்கு உட்பட்டவைகளும் உண்டு. மார்க்கம் அனுமதித்தவற்றை ஏற்றுக் கொண்டு மார்க்கம் அனுமதிக்காதவற்றை அவர்களுக்கு விளக்கம் கூறி தெளிவூட்டியிருக்கலாம்.

அப்படி செய்திருந்தால், அவர்களுக்கு உரிய தீர்வை கொடுத்திருந்தால் என்றோ இந்தப் பிரச்சினை தீர்ந்திருக்கும். இவர்கள் அதையும் செய்யவில்லை. - செய்யவில்லை என்பதைவிட குறித்த பெண்கள் தரப்பினர் முன்வைத்த கேள்விகளுக்கு பதில் சொல்லும் அளவுக்கு ஆதாரபூர்வமான நபிமொழிகளின் ஊடான எந்தவொரு நியாயமான தர்க்கங்களும் இவர்களுக்கே தெரியாது என்பதுதான் யாதார்த்தம்.

2009க்கு பின் மஹிந்த ராஜபக்ஷவின் ஆட்சியில் நீதி அமைச்சராக மு.க தலைவர் ரவுப் ஹக்கீம் நியமிக்கப்பட்டார். அவர் காலத்தில் அவராவது இதற்கு முடிவு கட்டியிருக்கலாம். ஆனால் அவருக்கும் இதில் எந்தத் தேவையும் இல்லை. அவர் எதற்குத் தான் முடிவு கண்டார்? என்கிற கேள்விதானே எப்போதும் எழுகிறது.

தன் கட்சியைக் கூட ஒழுங்கான கட்டமைப்பில் வைத்துக் கொள்ள முடியாதவர் தான் சமூகக் கட்டமைப்பை சரிசெய்வாரா என்ன?

    எழும்பில்லாத நாக்கு எதையும் பேசும், மக்கள் மறதியுள்ளவர்க்ள அவசரமாக மறந்து விட்டு அடுத்த தேர்தலில் எமக்குத்தானே வாக்களிக்கிறார்கள் என்ற அசால்டு நம்பிக்கை அவருக்கு அதிகமே இருக்கிறது.

20ம் திருத்தத்திற்கு ஆதரவளித்த மு.க எம்.பி க்களுக்கு நடவடிக்கை எடுத்து ஓரங்கட்டுவோம் என்று சொல்வார். அடுத்த 2 மாதங்களில் அவர்களை நாங்கள் மன்னித்து விட்டோம் என்பார். இந்த சமூகத்தில் தலையில் மண்ணை அள்ளி மூட்டை மூட்டையாக கொட்டிய 20ம் திருத்தத்திற்கான ஆதரவையே அவர் பெரிதாக நினைக்கவில்லை. காரணம் இந்த மக்களுக்கு எங்களை விட்டால் வாக்களிக்க யாருமில்லை. அடுத்த தேர்தலில் இதே ஆட்கள் இதே கட்சிகளில் வந்து மீண்டும் கோட்டா, மஹிந்த, பசில், நாமல் என்று மேடை தோறும் திட்டித் தீர்ப்பார்கள். பின்னர் அவர்களுக்கே கூஜா தூக்குவார்கள் மக்களும் “சேருக்கு வாக்குப் போடாமல் யாருக்கு போடுவது” என வாக்களித்து விட்டு மீண்டும் பழையபடி திட்ட ஆரம்பித்து விடுவார்கள். அவ்வளவு தானே?

அதனால் தான் முஸ்லிம் தனியார் சட்ட விவகாரத்தை நீதி அமைச்சராக இருந்த போது திருத்தி முடிவு காண வேண்டும் என அவர் தூசுக்கும் நினைக்கவில்லை.

இது பரவாயில்லை. கடந்த 2015ம் ஆண்டும் மைத்திரி - ரனில் ஆட்சி, அதாவது நல்லாட்சி வந்ததே அப்போது நீதி அமைச்சராக தலதா அத்துக்கோரள நியமிக்கப்பட்டிருந்தார். முஸ்லிம் தனியார் சட்டத் திருத்தத்தை முடிவுக்கு கொண்டுவர வேண்டும் என்பதில் அவர் மிக உறுதியாக இருந்து பல முன்னெடுப்புகளை செய்தார்.

அப்போதும் என்ன நடந்தது நினைவிருக்கிறதா?

மிலிந்த மொரகொட அமைத்த நீதியரசர் சலீம் மர்சூப் தலைமையிலான முஸ்லிம் தனியார் சட்ட திருத்தக் குழு இதுதான் இறுதித் திருத்தம் என அமைச்சர் தலதா அத்துக்கோரலவிடம் சென்று வழங்கியது.

அடுத்த சில நாட்களிலேயே திருத்தம் அப்படி வரக்கூடாது நாங்கள் சொல்லும் ஷாபி மத்ஹபு அடிப்படையில் தான் வரவேண்டும் இதோ எங்கள் பரிந்துரை என மீண்டும் குட்டையில் கல் எரிந்து அதையும் நாசமாக்கி பெருமையை தமதாக்கிக் கொண்டது ரிஸ்வி முப்தி தலைமையிலான உலமா சபை.

 மொத்தத்தில் இதற்கு தீர்வு வந்துவிடக் கூடாது என்பதில் மிக கவனமாக இருந்தார்கள் என்பது மட்டும் தெட்டத் தெளிவு.

 நல்லாட்சி அரசாங்கம் முடிவுக்கு வரும் வரை இதே இழுபறியில் அந்த முயற்சியும் முடிவுக்கு வந்தது.

அதன் பின்னர் மீண்டும் கோட்டாபய ராஜபக்ஷ தலைமையிலான ராஜபக்ஷ ஆட்சி ஏற்பட்டது.

கொரோனாவில் மரணித்தவர்களை அடக்கம் செய்ய வேண்டும் அவர்களின் ஜனாஸாக்களை எரிப்பதை நிறுத்துங்கள் என மார்பில் அடித்துக் கொண்டு இந்த முழு சமூகமும் வீதியில் இறங்கி ஒவ்வொரு நாளும் போராடிய நேரத்தில் எமக்கு ஜனாஸாவின் சாம்பலைத் தந்தால் போதுமென இஸ்லாத்தில் இல்லாத சாம்பல் கலாசாரத்தை உண்டாக்கி விட்டார் உலமா சபையின் நிரந்தர தலைவர் ரிஸ்வி முப்தி.

சாம்பலை அடக்குவதற்கு அரசாங்கம் கெஸட் - வர்த்தமானி அறிவிப்பையே வெளியிட்டது. இந்த உலகத்தில் எந்த நாட்டிலும் நடக்காத பத்வாவும், செயல்பாடுகளும் இலங்கையில் நடந்தது.

இஸ்லாத்திற்கே மாற்றமான சாம்பல் பத்வாவை சரிக்கட்ட பலரும் அதற்காக கூஜா தூக்கியதை நினைத்துப் பாருங்கள். அப்பாவி முஸ்லிம் சகோதரர்கள் சிலர் மார்க்கம் அறியாமல் உடலை எரித்த பின் சாம்பலை கொண்டு சென்று மையவாடிகளில் புதைத்தார்கள். நம் முப்தி மார்க்கத்தில் உள்ளதைத் தான் கூறுகிறார் என நம்பினார்கள்.

ஆனால், முப்தியோ சாம்பல் பத்வாவுக்கும் ஷாபி மத்ஹபின் துணை தேடினார். பாவம், ஷாபி மத்ஹபில் கூட அப்படியொரு வழிகாட்டல் இல்லையென்பது அவருக்கும் தெரியாது. யார் இதையெல்லாம் தேடிப்பார்க்கப் போகிறார்? நாம் சொன்னால் சரியென்று தலையாட்டுவார்கள் என்ற தலைக்கனம் இன்று முழு சமூகத்தையும் நடுத் தெருவில் நிறுத்தி விட்டது.

இப்போதாவது காதி நீதிமன்றங்களுக்காக முப்தியும் அவர் சார்ந்த உலமா சபையும் நீதி கோருவார்களா?

 நாங்கள் தான் இந்த சமூகத்தின் உயர்பீடம் என தங்களைத் தாங்களே பீற்றிக் கொண்டு திரியும், சில லெட்டர்பேட் இயக்கங்கள் என்ன செய்யப் போகின்றன?

 இதற்கும் நாளை வெளிவரும் விடிவெள்ளி பத்திரிக்கையில் அறிக்கையொன்றை வெளியிட்டு விட்டு ஏதோ சிவனொளிபாத மலையை சிலோனை விட்டே அகற்றியது போல பேசிக்கொண்டு திரிவார்கள்.

அன்று பெட்டிக்கடையில் பேசிய வெட்டிப் பேச்சுக்களை இன்று பேஸ்புக்கிலும், வட்ஸ்அப்பிலும் செய்து கொண்டிருக்கிறார்கள் நம் புத்தி(?)ஜீவிகள்.

மொத்தத்தில் புதிதாக எந்தவொரு உரிமையையும் நாம் பெற்றுக் கொள்ளவில்லை. இருக்கும் அனைத்து உரிமைகளையும் வரிசைப்படி இழந்து கொண்டிருக்கிறோம்.

 துருக்கித் தொப்பியை அணிந்து கொண்டு நீதிமன்றத்தில் வாதாட அனுமதிக்க வேண்டும் என அப்போதைய ஆங்கில நீதிபதி லயட்டுக்கு எதிராக நம் முன்னோர்கள் சட்டப் போராட்டம் நடத்தி ஜனநாயக ரீதியில் பிரித்தானியா வரை சென்று குரல் எழுப்பி உரிமையை வென்று வந்தார்கள்.

அந்தளவுக்கு இல்லாவிட்டாலும் குறைந்தளவுக்காவது நம் உரிமையை பாதுகாக்க சட்டப் போராட்டம் நடத்தக் கூடாதா?

என்று தான் விளிக்கப் போகிறோம்?

#இறுதியாக....

தற்போதைய நீதி அமைச்சர் அலி சப்ரி அவர்கள் காதி நீதிமன்றங்கள் இல்லாதொழிக்கப்படும் என்பதை பகிரங்கமாக அறிவித்து விட்டார். அது எப்படியும் நடக்கத் தான் போகிறது. அவரின் பேச்சில் அதுதான் புலப்படுகிறது.

இருப்பினும், தனக்கு ஒன்றும் செய்ய முடியாது என்றும் அவர் கைவிரித்து விட்டார்.

தான் தேர்தலில் போட்டியிட்டு வெற்றி பெற்று வந்த ஒரு அரசியல்வாதி இல்லையெனவும், தேசிய பட்டியல் மூலம் பாராளுமன்றம் வந்தவர் எனவும் அமைச்சரவையில் 30 பெரும்பான்மை அமைச்சர்கள் இருக்கும் நிலையில் என்னால் மட்டும் அங்கு ஒன்றும் செய்ய முடியாது. அதுவும் தேசிய பட்டியலில் வந்த நான் என்னதான் செய்ய முடியும்? என்ற கேள்வியை எழுப்பி அவரும் ஒதுங்கிக் கொண்டார்.

 காதி நீதிமன்றங்களுக்காக யார் சட்ட ரீதியாகவும், ஜனநாயக ரீதியாகவும் போராடப் போகிறார்கள் என்பதை பொறுத்திருந்து பார்ப்போம்.

 எது எப்படியோ சாரத்தை கிழித்து கைக்குட்டை தைக்கும் நிலைக்கு இன்று இந்த சமூகம் மாறியுள்ளது என்பது மட்டும் தெளிவாகி விட்டது.

அல்லாஹ்வே போதுமானவன்!

ரஸ்மின் MISc



July 31, 2021

முஹம்மத் நபி (ஸல்) அவர்கள் சிறு வயது ஆயிஷா (ரலி) யை திருமணம் செய்தது ஏன்? - காரைதீவு பி.சபை தலைவர் ஜெயசிரிலின் விமர்சனத்திற்கு பதில்!

 


கடந்த ஓரிரு நாட்களுக்கு முன்பதாக காரைத்தீவு பிரதேச சபை தலைவர் ஜெயசிரில் என்பவர் நபிகள் நாயகம் (ஸல்) அவர்கள் தொடர்பில் தனது முகநூல் பக்கத்தில் அறியாமையினால் ஓர் விமர்சனத்தை முன்வைத்திருந்தார். குறித்த விமர்சனம் இலங்கை முஸ்லிம்கள் மத்தியில் பாரிய கவலையை உண்டாக்கியது. 

 

குறிப்பாக முன்னால் அமைச்சர் ரிஷாத் பதியுத்தீன் அவர்களின் வீட்டில் வேலை செய்த யுவதி ஒருவர் மரணித்த சம்பவம் தொடர்பில் குறித்த யுவதி பாலியல் துஷ்பிரயோகத்திற்கு உள்ளாக்கப்பட்டுள்ளார் என்ற ஒரு சந்தேக குற்றச்சாட்டும் முன்வைக்கப்படும் நிலையில் அதனையொட்டி காரைத்தீவு பிரதேச சபை தலைவர் வெளியிட்ட குறித்த முகநூல் பதிவில் நபிகள் நாயகம் (ஸல்) அவர்கள் அன்னை ஆயிஷா (ரலி) அவர்களை அவருடைய சிறுவயதில் திருமணம் செய்ததை இழிவாக சித்தரித்து நபிகள் நாயகம் அவர்களை தவறான நடத்தை கொண்டவராக சித்தரிக்க முயன்றிருந்தார். 

 

பின்னர், முஸ்லிம்கள் மத்தியில் ஏற்பட்ட பாரிய எதிர்ப்புகள் காரனமாக தனது முகநூலில் குறித்த செய்தி வந்திருந்தாலும் அது எப்படி வந்தது என்பது எனக்குத் தெரியாது. நான் அறிந்து செய்யவில்லை என்றெல்லாம் மாறி மாறி விளக்கங்களை அவர் கூறி வருகிறார். 

 

இந்நிலையில், முஸ்லிம்கள் உயிரினும் மேலாக மதிக்கும் முஹம்மத் நபி (ஸல்) அவர்கள் அன்னை ஆயிஷா (ரலி) அவர்களை சிறுவயதில் திருமணம் முடித்தது ஏன்? என்ற கேள்விக்கு பதிலளிப்பது காலத்தின் கட்டாயம் எனும் வகையில் இந்த பதிலை இங்கு வெளியிடுகிறோம்.


முஹம்மத் நபி (ஸல்) அவர்கள் சிறு வயது ஆயிஷா (ரலி) யை திருமணம் செய்தது ஏன்?

 

ஆயிஷா (ரலி) அவர்களுக்கு ஆறு வயது இருக்கும் போது அவர்களை நபிகள் நாயகம் (ஸல்) அவர்கள் மணமுடித்தார்கள் என்று ஆதாரப்பூர்வமான செய்திகளில் கூறப்பட்டுள்ளது.

 

5133 حَدَّثَنَا مُحَمَّدُ بْنُ يُوسُفَ حَدَّثَنَا سُفْيَانُ عَنْ هِشَامٍ عَنْ أَبِيهِ عَنْ عَائِشَةَ رَضِيَ اللَّهُ عَنْهَا أَنَّ النَّبِيَّ صَلَّى اللَّهُ عَلَيْهِ وَسَلَّمَ تَزَوَّجَهَا وَهِيَ بِنْتُ سِتِّ سِنِينَ وَأُدْخِلَتْ عَلَيْهِ وَهِيَ بِنْتُ تِسْعٍ وَمَكَثَتْ عِنْدَهُ تِسْعًا رواه البخاري

 

நான் ஆறு வயதுடையவளாய் இருந்த போது என்னை நபிகள் நாயகம் (ஸல்) அவர்கள் மணந்து கொண்டார்கள். எனக்கு ஒன்பது வயதான போது என்னுடன் தாம்பத்திய உறவைத் தொடங்கினார்கள். நான் அவர்களுடன் ஒன்பது வருடங்கள் (மனைவியாக) வாழ்ந்தேன்.

அறிவிப்பவர் : ஆயிஷா (ரலி)

நூல் : புகாரி 5133

ஆயிஷா (ரலி) அவர்களை பருவ வயது அடைவதற்கு முன்னர் நபிகள் நாயகம் (ஸல்) அவர்கள் திருமணம் செய்ததாக இந்த ஹதீஸ் கூறுகிறது.

அகில உலகுக்கு வழிகாட்டியாக வந்த நபிகள் நாயகம் (ஸல்) அவர்கள் சிறுமியைத் திருமணம் செய்தது நியாயமானது தானா? என்று முஸ்லிமல்லாதவர்கள் கேள்வி எழுப்புகிறார்கள்.

நபிகள் நாயகம் (ஸல்) அவர்கள் சிறுமையைத் திருமணம் செய்ததை ஆதாரமாகக் கொண்டு நாமும் சிறுமியைத் திருமணம் செய்யலாமா என்பது முஸ்லிம்களில் பலருக்கு இருக்கும் சந்தேகம்.

இது குறித்து தக்க முறையில் அறிந்து கொண்டால் இரு சாராரின் சந்தேகமும் முற்றாக விலகி விடும்.

நபிகள் நாயகம் (ஸல்) அவர்கள் இறைத்தூதராக நியமிக்கப்பட்ட போது அவர்களுக்கு இடப்பட்ட ஒரே கட்டளை ஒரே இறைவனாகிய அல்லாஹ்வை மட்டுமே வணங்க வேண்டும் என்பது மட்டுமே. இந்த அடிப்படைக் கொள்கையை ஏற்றவர் உடனே முஸ்லிமாகி விடுவார், இதன் பின்னர் அவர் அந்தச் சமுதாய வழக்கப்படி நடந்து கொள்வார். ஏனெனில் இஸ்லாத்தின் அனைத்து சட்டங்களும் ஒரே நேரத்தில் அவர்களுக்கு அருளப்படவில்லை. சிறிது சிறிதாக 23 ஆண்டுகளில் ஒவ்வொரு சட்டமாகவே அவர்களுக்கு அருளப்பட்டது.

இறைவனிடம் இருந்து எது குறித்து சட்டம் அருளப்படவில்லையோ அந்த விஷயங்களில் அந்தச் சமுதாயத்தில் நிலவிய பழக்க வழக்கங்களின்படியே நபிகள் நாயகம் (ஸல்) அவர்களும், இஸ்லாத்தை ஏற்றவர்களும் நடந்து கொண்டனர்.

அன்றைய மக்களில் மதுபானம் அருந்தக் கூடியவர்கள் தான் அதிகமான இருந்தனர். அது குறித்து இறைவனின் தடை உத்தரவு வருவது வரை இஸ்லாத்தை ஏற்றுக் கொண்டவர்களில் மதுப்பழக்கம் உள்ளவர்கள் தங்களின் பழைய வழக்கத்தையே தொடர்ந்தனர்.

இறைவன் தடை செய்யாததால் நபிகள் நாயகம் (ஸல்) அவர்களும் அதைத் தடை செய்யவில்லை.

அதுபோல் தான் சிறுவயதுப் பெண்ணை திருமணம் செய்வது அன்றைய அரபுகள் மத்தியில் சாதாரணமாக நடந்து வந்தது. சிறுமிகளைத் திருமணம் செய்யக் கூடாது என்ற தடை விதிக்கப்படுவதற்கு முன் அந்த வழக்கப்படி நபிகள் நாயகம் ஸல் அவர்களும் சிறு வயதுடைய ஆயிஷா (ரலி) அவர்களைத் திருமணம் செய்தார்கள்.

பின்னர் திருமணத்திற்கான ஒழுங்குகள் இறைவன் புறத்தில் இருந்து அருளப்பட்டன. விபரமில்லாத சிறுமிகளைத் திருமணம் செய்வதை இஸ்லாம் முற்றாகத் தடை செய்தது. இதைப் பின்வரும் ஆதாரங்களிலிருந்து அறியலாம்.

திருமண வயது என்று ஒரு குறிப்பிட்ட வயதை இஸ்லாம் குறிப்பிடாவிட்டாலும் ஒரு பெண் திருமணம் செய்து கொள்ள வேண்டிய தருணம் எது என்பதை மிகத் தெளிவாக குறிப்பிடுகிறது.

திருமண வாழ்வில் பெண்கள் ஆற்ற வேண்டிய கடைமைகள் பல உள்ளன. கணவனுக்குக் கட்டுப்படுவதும், வீட்டைக் கவனிப்பதும், குழந்தைகளைப் பேணுவதும் மனைவியின் கடமையாகும். விவரமற்ற சிறுமிகளால் இந்தக் கடமைகளைப் பேண இயலாது.

பெண்களுக்குக் கடமைகள் இருப்பது போல அவர்களுக்கு உரிமைகளும் சிறந்த முறையில் உள்ளன.

திருக்குர்ஆன் 2:228

தன் கணவனைத் தேர்வு செய்யும் உரிமையைப் பெண்ணுக்கு இஸ்லாம் வழங்கியுள்ளது. விபரமுள்ள பெண்களே இந்த உரிமையைச் சரியாகப் பயன்படுத்த முடியும். சிறு வயது பெண்கள் சுயமாக தனது கணவனைத் தேர்வு செய்யும் நிலையில் இல்லை.

நம்பிக்கை கொண்டோரே! பெண்களை வலுக்கட்டாயமாக அடைவது உங்களுக்கு அனுமதி இல்லை.

திருக்குர்ஆன் 4:19

صحيح البخاري

6971 – حَدَّثَنَا أَبُو عَاصِمٍ، عَنِ ابْنِ جُرَيْجٍ، عَنِ ابْنِ أَبِي مُلَيْكَةَ، عَنْ ذَكْوَانَ، عَنْ عَائِشَةَ رَضِيَ اللَّهُ عَنْهَا، قَالَتْ: قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «البِكْرُ تُسْتَأْذَنُ» قُلْتُ: إِنَّ البِكْرَ تَسْتَحْيِي؟ قَالَ: «إِذْنُهَا صُمَاتُهَا»

கன்னிப் பெண்ணிடமும், விதவையிடமும் சம்மதம் பெற வேண்டும் என்று நபிகள் நாயகம் (ஸல்) கூறிய போது, கன்னிப் பெண் வெட்கப்படுவாளே? என்று நான் கேட்டேன். அதற்கு நபிகள் நாயகம் (ஸல்) அவர்கள், அவளது மௌனமே அவளது சம்மதமாகும் என்று கூறினார்கள்.

அறிவிப்பவர் : ஆயிஷா (ரலி)

நூல்: புகாரி 6971, 6964, 5137

صحيح البخاري

5138 – حَدَّثَنَا إِسْمَاعِيلُ، قَالَ: حَدَّثَنِي مَالِكٌ، عَنْ عَبْدِ الرَّحْمَنِ بْنِ القَاسِمِ، عَنْ أَبِيهِ، عَنْ عَبْدِ الرَّحْمَنِ، وَمُجَمِّعٍ، ابْنَيْ يَزِيدَ بْنِ جَارِيَةَ، عَنْ خَنْسَاءَ بِنْتِ خِذَامٍ الأَنْصَارِيَّةِ، أَنَّ أَبَاهَا زَوَّجَهَا وَهْيَ ثَيِّبٌ فَكَرِهَتْ ذَلِكَ، فَأَتَتْ رَسُولَ اللَّهِ صَلَّى اللهُ عَلَيْهِ وَسَلَّمَ «فَرَدَّ نِكَاحَهُ»،

என் தந்தை எனது சம்மதம் பெறாமல் எனக்கு மணமுடித்து வைத்தார். அதனை விரும்பாத நான் நபிகள் நாயகம் (ஸல்) அவர்களிடம் வந்து கூறிய போது, அத்திருமணத்தை ரத்து செய்தார்கள்.

அறிவிப்பவர்: கன்ஸா பின்த் கிதாம் (ரலி)

நூல்: புகாரி 5139, 6945, 6969

அப்பெண்கள் உங்களிடம் கடுமையான உடன்படிக்கையை எடுத்துள்ளார்கள்.

திருக்குர்ஆன் 4:21

இந்த வசனத்தில் திருமணத்தை ஒரு கடுமையான ஒப்பந்தம் என்று திருக்குர்ஆன் கூறுகின்றது. அந்த ஒப்பந்தம் செய்வதற்கான தகுதியும், முதிர்ச்சி பருவ வயதை அடைந்தால் தான் ஏற்படும்.

மண வாழ்க்கையில் தன்னுடைய உரிமைகள் என்ன? கடமைகள் என்ன? தனக்கு கணவனாக வருபவர் எவ்வாறு இருக்க வேண்டும்? என்று நன்கு ஆராய்ந்து முடிவெடுப்பதற்கு ஏற்ற வயதில் தான் பெண்களின் திருமணங்கள் நடைபெற வேண்டும் என்பதை இந்த வசனங்களும், ஹதீஸ்களும் உறுதி செய்கின்றன.

திருமணம் என்பது கடுமையான உடன்படிக்கை என்றால் கணவன் மனைவி ஆகிய இருவரும் திருமணம் என்றால் என்ன? எதற்காகத் திருமணம் செய்யப்படுகிறது? ஆணுக்கும் பெண்ணுக்கும் உள்ள வேறுபாடு என்ன? என்பதையெல்லாம் அறிந்தால் தான் அதை ஒப்பந்தம் என்று கூற முடியும்.

இதை எல்லாம் அறிய முடியாத பருவத்தில் உள்ள ஆணுக்கோ பெண்ணுக்கோ திருமணம் செய்விப்பதற்கு இப்போது அனுமதி இல்லை. இந்தச் சட்டம் நடைமுறையில் இல்லாத காலத்தில் நபிகள் நாயகம் (ஸல்) அவர்களும் இஸ்லாத்தை ஏற்ற பலரும் சிறுமிகளைத் திருமணம் செய்திருந்தனர்.

இத்திருமணம் இறைவன் தடை செய்வதற்கு முன்னர் நடந்தது என்பதால் நபிகள் நாயகத்தின் ஒழுக்கத்தை இது பாதிக்கும் என்று கருத எந்த நியாயமும் இல்லை.

நபிகள் நாயகம் (ஸல்) அவர்கள் பால்ய விவாகத்தை தவறு என்று எப்போது போதித்தார்களோ அதன் பின்னர் அவர்கள் பால்ய வயதுடைய சிறுமியைத் திருமணம் செய்திருந்தால் தான் அதைக் குறை கூற முடியும். அதை தடை செய்யாமல் ஊர் வழக்கப்படி அவர்கள் நடந்து கொண்டிருந்த நிலையில் இத்திருமணம் நடந்ததால் இது விமர்சனத்துக்கு உரியதாக ஆகாது.

கடவுள் மறுப்புக் கொள்கையைப் பிரச்சாரம் செய்யும் ஒருவர் இப்பிரச்சாரம் செய்வதற்கு முன் கோவில் தர்மகர்த்தாவாக இருந்திருக்கலாம். அப்போது கடவுள் வழிபாட்டை நடத்தி இருக்கலாம். அதை விமர்சிப்பது நியாயமான விமர்சனமாக ஆகாது. அது தவறு என்ற பிரச்சாரத்தை மேற்கொண்ட பின்னர் அவர் கடவுள் வழிபாடு செய்தால் அதுதான் விமர்சனத்துக்கு உரியதாகும்.

 

நன்றி: www.onlinepj.in

June 14, 2021

மீன் வயிற்றில் மனிதன் உயிருடன் இருக்க முடியுமா? - குர்ஆன் கற்றுத் தரும் அழகிய அறிவியல்.


 
திமிங்கிலத்தினால் விழுங்கப்பட்ட அமெரிக்காவை சேர்ந்த ஒருவர் உயிருடன் மீண்ட சம்பவம் தொடர்பில் ஊடகங்கள் செய்தி வெளியிட்டுள்ளன.


இந்நேரத்தில் இது தொடர்பான குர்ஆனிய வழிகாட்டல் பற்றி நாம் இந்நேரத்தில் புரிந்து கொள்ள வேண்டும்.

திருமறைக் குர்ஆன் 37:142, 21:87, 68:48 ஆகிய வசனங்களில் யூனுஸ் என்ற இறைத்தூதர் மீன் வயிற்றில் சிறை வைக்கப்பட்ட அழகிய அறிவியல்பூர்வமான ஒரு உண்மையை உலகத்தாருக்கு விபரிக்கிறது.

அமெரிக்கரான ஆய்வாளர் திமிங்கிலத்தினால் விழுங்கப்பட்டு உயிருடன் மீண்ட சம்பவத்துடன் குர்ஆனிய அறிவியலை நோக்கினால் அன்றும், இன்றும் என்றும் குர்ஆன் மட்டுமே அகிலத்தாருக்கு அழகிய வழிகாட்டி என்பதை உள்ளூர நாம் உணர முடியம்.

குர்ஆன் கூறும் வரலாற்றை ஆரம்பமான பார்ப்போம்.

யூனுஸ் தூதர்களில் ஒருவர்.

நிரப்பப்பட்ட கப்பலை நோக்கி அவர் ஒளிந்தோடியபோது, அவர்கள் (கப்பலில் இருந்து யாரை வெளியேற்றுவது என்று) சீட்டுக் குலுக்கினர். தோற்றவர்களில் அவர் ஆகி விட்டார்.

இழிந்தவராக இருக்கும் நிலையில் அவரை மீன் விழுங்கியது.

அவர் (நம்மை) துதிக்காது இருந்திருந்தால் அவர்கள் உயிர்ப்பிக்கப்படும் நாள் வரை அதன் வயிற்றிலேயே தங்கியிருப்பார்.

அவரை நோயுற்றவராக வெட்ட வெளியில் எறிந்தோம்.

அல்குர்ஆன் 37:142-145


இவ்வசனங்கள் (37:142, 21:87, 68:48) யூனுஸ் நபி அவர்கள் சில நாட்கள் மீன் வயிற்றில் சிறை வைக்கப்பட்டதாகக் கூறுகின்றன.

மீன் வயிற்றுக்குள் மனிதன் எப்படி உயிருடன் இருக்க முடியும்? ஆக்ஸிஜன் இல்லாமல் மனிதன் செத்து விடுவானே என்று சிலர் கேள்வி எழுப்புகிறார்கள்.

இறைவன் நாடினால் இது போன்ற அற்புதங்களை நிகழ்த்த முடியும் என்றாலும் மீன் வயிற்றில் யூனுஸ் நபியவர்கள் உயிருடன் இருந்ததற்கு அறிவியல் சாத்தியம் உள்ளது என்பதைக் கூடுதல் தகவலாகத் தருகிறோம்.

மனிதனை விழுங்கும் அளவில் கடலில் ஒரு மீன் உள்ளது என்றால் அது திமிங்கலம் என்ற மீன்தான்.

கடலில் உள்ள பல்வேறு திமிங்கலங்களில் நீலத் திமிங்கலம் என்ற ஒரு வகை உண்டு. இத்திமிங்கலத்தின் நாக்கில் 50 பேர் உட்காரக்கூடிய அளவு இடமிருக்கும். இத்தகைய திமிங்கலத்திடம் மூர்க்கமான குணங்கள் கிடையாது. இவை மிகவும் சாதுவானவை ஆகும்.

நாக்கில் மட்டும் ஐம்பது பேர் அமர முடியும் என்றால் அதன் வயிற்றுப் பகுதி எவ்வளவு பிரம்மாண்டமாக இருக்கும் என்று நாம் ஊகம் செய்து கொள்ளலாம்.

திமிங்கலம் மற்ற மீன்களில் இருந்து மாறுபட்ட படைப்பாகும். இது மீன் இனமாக இருந்தாலும் இது விலங்கினங்களைப் போல் தனது குட்டிகளுக்குப் பாலூட்டக் கூடிய உயிரினமாகும்.

மேலும் மீன்கள் தமது செவுள்களால் சுவாசிக்கின்றன. ஆனால் திமிங்கலங்கள் மனிதனைப் போன்ற நுரையீரல்களைக் கொண்டுள்ளதால் தமது நுரையீரல்களால் சுவாசிக்கக் கூடியவை. நீரின் மேல்மட்டத்துக்கு வந்து தேவையான காற்றை உள் இழுத்துக் கொள்ளும். நீருக்கு அடியில் மூச்சுவிடாமல் இரண்டு மணி நேரம் கூட மூச்சடக்கிக் கொள்ளும். மனிதர்கள் சுவாசிக்கும் போது காற்றில் இருந்து 15 சதம் ஆக்ஸிஜனை உள் இழுக்கிறோம், ஆனால் திமிங்கலங்கள் காற்றில் இருந்து 90 சதம் ஆக்ஸிஜனை உள் இழுத்துக் கொள்வதால் 7000 அடி ஆழம் சென்றாலும் இவற்றால் நீண்ட நேரம் மூச்சடக்க முடிகிறது.

திமிங்கலத்தின் இந்த தனித் தன்மையைக் கவனத்தில் கொண்டால் அவை சுவாசித்து உள்ளே சேமித்துக் கொள்ளும் ஆக்ஸிஜன் அதன் வயிற்றுக்குள் இருந்த யூனுஸ் நபி சுவாசிக்க போதுமானதாகும். ஆக்ஸிஜன் முடியும் நேரத்தில் அவை நீருக்கு மேல் தலையை நீட்டி காற்றை உள் இழுத்துக் கொள்ளும் அவசியம் உள்ளதால் யூனுஸ் நபிக்கு ஆக்ஸிஜன் பற்றாக்குறை ஏற்பட வழியில்லை.

ஒரு கண்ணாடி அறையில் வெளிக்காற்று புகாமல் அடைத்து ஒருவரை உள்ளே வைத்தால் அந்த அறைக்குள் இருக்கும் காற்றே சில மணி நேரங்கள் அந்த மனிதன் சுவாசிக்கப் போதுமானதாகும்.

திமிங்கலம் உள்ளிழுக்கும் காற்றில் அதிக ஆக்ஸிஜன் இருப்பதால் யூனுஸ் நபி மீன் வயிற்றில் உயிருடன் இருந்தது அறிவியலுக்கு உடன்பாடானது தான். இதில் அறிவியல் பூர்வமாக கேள்வி கேட்க வழியில்லை. இன்னும் சொல்வதாக இருந்தால் கடலில் இது போன்ற தனித்தன்மை வாய்ந்த மீன்களும் உள்ளன என்ற அறிவியல் முன்னறிவிப்பாக இதை எடுத்துக் கொள்ளலாம்.

(அறிஞர் பி.ஜெய்னுலாப்தீன் அவர்களின் திருக்குர்ஆன் மொழிபெயர்ப்பு விளக்கக் குறிப்பு எண் 395)

நீலத்திமிங்கிலங்களில் உள்ள அறிவியல் தன்மையும் குர்ஆன் கூறும் யூனுஸ் நபியின் அழகிய வரலாறும் குர்ஆனில் அறிவியல் பார்வையை மிக அழகாக எடுத்துரைக்கின்றன.

அமெரிக்க ஆய்வாளரான மைக்கேல் பெக்காட் அவர்களை விழுங்கியதும் ஒரு திமிங்கிலம் தான் என்பதும் மேலதிகமாக நாம் கவனிக்க வேண்டிய ஒன்றாகும்.

June 4, 2021

குஜராத், காஷ்மீரை தொடர்ந்து லட்சத்தீவு முஸ்லிம்களை அழிக்கத் துடிக்கும் இந்திய – மோடி அரசு.


 

இந்தியாவில் நரேந்திர மோடி பிரதமராக பொறுப்பேற்று பாரதீய ஜனதா கட்சியின் ஆட்சி அமையப்பெற்று இத்தனை ஆண்டுகளில் இனவாதத்தையும், மதவாதத்தையும் மாத்திரம் அடிப்படையாக வைத்தே அவர்களின் ஆட்சி தொடர்கிறது என்பது உலகறிந்த விஷயம்.

 

முஸ்லிம்கள் மீதான வெறுப்புணர்வை கக்கி ஆட்சிக்கு வந்தவர்கள் தமது ஆட்சியை நிலை நிறுத்திக் கொள்வதற்கும் தொடர்ந்தும் முஸ்லிம்கள் மீதான வெறுப்பையே கட்டவிழ்த்து வருகிறார்கள்.

 

உலகம் முழுவதும் முஸ்லிம்கள் சிறுபான்மையாக வாழும் நாடுகளில் முஸ்லிம்கள் பயங்கரவாதிகளாக காட்டி அல்லது முஸ்லிம்கள் மீதான பயத்தையும், வெறுப்பையும் உண்டாக்கியே பல நாடுகள் ஆட்சியை தக்கவைத்துக் கொள்கின்றன.

 

உய்க்குர் முஸ்லிம்களை சித்தரவதை செய்தும், தனிமைப்படுத்தப்பட்ட வதை முகாம்களில் வைத்து அநியாயம் செய்தும் அவர்களை பெரும் குற்றவாளிகளாகவும் சீன மக்களுக்கு எதிரிகளாகவும் சித்தரித்து சீனா தனது ஆட்சியை தொடர்கிறது.

 

ரோஹிங்யா முஸ்லிம்களை நாட்டுக்கு எதிரானவர்களாகவும், நாட்டின் துரோகிகளாகவும் சித்தரித்து சொல்ல முடியாத அளவு துன்பங்களை அவர்களுக்கு வழங்கி அதனை வைத்து அரசியல் நடத்திக் கொண்டு மியன்மாரின் ஆட்சிகள் கடக்கின்றன.

 

ரஷ்யாவுக்கு ஒரு செச்னியா, இஸ்ரேலுக்கு பலஸ்தீனம் என உலக நாடுகளின் பல அப்பாவி முஸ்லிம்களை வதை செய்தே தம் ஆட்சியை தக்கவைத்துக் கொண்டிருக்கின்றன.

 

அந்த வகையில் தான் இந்தியாவின் ஆளும் பாரதீய ஜனதா கட்சியும் இந்தியப் பிரதமர் நரேந்திர மோடியும் இந்திய முஸ்லிம்கள் மீதான வெறுப்பை உண்டாக்கியே தம் ஆட்சியை கொண்டு செல்கிறார்கள்.

 

எந்தத் தேர்தல் வந்தாலும் முஸ்லிம்களுக்கு எதிரான பிரச்சாரமே அவர்களின் தேர்தல் வியூகமாக அமைத்துக்கொள்ளப்படுகிறது.

 

இந்தியாவின் உத்தரபிரதேஷ் மாநிலத்தில் மாட்டுக் கரி வைத்திருந்தார்கள் எனக் கூறி மாட்டுக்காக முஸ்லிம்களை கொலை செய்ததும் அதனை சரி கண்டு பேசியதும் உலகமே காரித்துப்பிய ஜனநாயகமாகும்.

 

சிறுமி ஆசிபா கொலை செய்யப்பட்டதும் அதற்கு ஆதரவாக மோடியின் அமைச்சர்கள் முதல் உள்ளூர் அரசியல்வாதிகள் வரை கருத்து வெளியிட்டதும் கூட மனித நேயத்தை கொலை செய்த காரியங்கள் தான்.

 

இப்படி இந்தியா முழுவதும் முஸ்லிம்களை வைத்தே தமது காரியங்களை கச்சிதமாக முன்னெடுத்து செல்கிறது இந்திய மோடி அரசு.

 

தனி சுயாட்சிப் பகுதியாக இருந்த காஷ்மீரை பலவந்தமாக இந்தியாவுடன் இணைத்து காஷ்மீரில் வாழும் முஸ்லிம்களின் குடியுரிமையை பரித்து இன்று வரை அங்கு இந்திய இராணுவத்தை நிலைப்படுத்தி வைத்து அங்குள்ள முஸ்லிம்களை சொல்லொனாத் துன்பங்களுக்கு உள்ளாக்கி வருகிறது மோடி அரசு.

 

அதே பாணியில் தான் தற்போது முஸ்லிம்களின் நிறைந்து வாழும் தனி யூனியன் பிரதேசமாக இருக்கும் இந்தியாவின் லட்சத்தீவுகளையும் கொல்லையடித்து, அங்கு வாழும் முஸ்லிம்களை அழிக்கத் துடிக்கிறது இந்திய அரசு.

 

லட்சத்தீவுகள் ஓர் அறிமுகம்.

 

இந்தியாவின் பகுதியாக அறியப்பட்டாலும் லட்சத்தீவு என்பது தமிழ்நாட்டின் ஒரு பகுதியாகவே ஆரம்பத்தில் இருந்து வந்துள்ளது. பின்னர் தனி யூனியன் பிரதேசமாக அறிவிக்கப்பட்ட லட்சத்தீவுகளில் பல நூறு தீவுக்கூட்டங்கள் ஆரம்பத்தில் இருந்தாலும் தற்போது மொத்தமாக அங்கு இருப்பது 36 தீவுகள் மாத்திரம் தான்.

 

லட்சத் தீவுகளின் தலைநகரமாக கவுரத்தில் அறியப்படுகிறது. இங்கு மலையாளம், ஆங்கிலம், திவேஹி, ஜெஸரி ஆகிய மொழிகள் பேசும் மக்கள் வாழ்கிறார்கள்.

 

தீவுக்கூட்டங்களை கொண்ட பகுதி என்பதால் விமானம் மற்றும் கடல் மார்க்கமான மாத்திரமே இங்கு செல்ல முடியும்.

 

லட்சத்தீவுகளில் மொத்தமாகவே 65 ஆயிரம் மக்கள் மாத்திரமே வாழ்கிறார்கள். இந்த 65 ஆயிரம் மக்களில் பெரும்பான்மையானவர்கள் முஸ்லிம்கள் முழு மக்கள் தொகையில் 96.58 சதவீதத்தினர் முஸ்லிம்களாகவும், 2.77 சதவீதத்தினர் இந்துக்களாகவும் இருக்கும் அதே வேலை 0.49 சதவீதம் கிருஸ்தவர்களும் இங்கு வாழ்கிறார்கள்.

 

லட்சத்தீவுகளுக்கு என்று தனியான சட்டமன்றமோ ஆட்சி மன்றமோ கிடையாது. ஒரேயொரு மாநிலங்களவை உறுப்பினர் மட்டுமே இருக்கிறார்.

 

இந்திய மத்திய அரசினால் நியமிக்கப்படும் நிர்வாகி ஒருவர் தான் இதன் ஆட்சியாளராக அறியப்படுவார்.

 

இதுவரை காலமும் இந்தப் பிரதேசத்திற்கு IAS அல்லது IPS அதிகாரிகளே நிர்வாகிகளாக நியமிக்கப்பட்டார்கள். ஆனால் முதல் முறையாக தற்போது லட்சத்தீவுகளுக்கான நிர்வாகியாக ஒரு அரசியல்வாதி நியமிக்கப்பட்டுள்ளார். அவர் தான் பிரபுல் கோடா பட்டேல் என்பவராவார்.

 

 

குஜராத்தின் முதல்வராக இன்றைய இந்தியப் பிரதமர் மோடி செயல்பட்ட நேரத்தில் பிரபுல் கோடா பட்டேல் 2010ம் ஆண்டில் மோடியின் அமைச்சரவையில் அமைச்சராக பதவியில் அமர்த்தப்பட்டார்.

 

பின்னன் நடைபெற்ற குஜராத் மாநில தேர்தல்களில் தோல்வியை தழுவிய பிரபுல் கோடா பட்டேலை லட்சத்தீவுகள் போன்ற சில பகுதிகளுக்கு நிர்வாகியாக நியமித்தது மோடி அரசு. அதன் தொடரில் தான் தற்போது லட்சத்தீவுகளுக்கும் நிர்வாகியாக கடந்த வருடம் டிசம்பர் மாதத்தில் இவர் நியமிக்கப்பட்டார்.

 


சுற்றுலாப் பயணிகளின் வருகையை நம்பி வாழும் லட்சத்தீவு மக்களின் வாழ்வாதாரத்தையும் அவர்களின் வாழ்க்கை பயணத்தையும் திசை திருப்பும் வகையில் இவருடைய வருகை அமைந்துள்ளது.

 

குஜராத்தில் முஸ்லிம்களை கறுவறுத்த மோடி அரசு, அதே பாணியில் சட்டத்தின் மூலம் காஷ்மீரில் முஸ்லிம்களை உரிமைகளைப் பரித்தது. அதன் தொடரில் தற்போது லட்சத்தீவு முஸ்லிம்களின் வாழ்க்கையையும் வாழ்வாதாரத்தையும் பரித்து நடுத்தெருவில் விடும் வேலையில் மிக வேகமாக களமிறங்கியுள்ளது.

 

இதுவரை காலமும் லட்சத்தீவுகளில் அங்கு வாழும் மக்களைத் தவிர வேறு யாரும் இடங்களை வாங்கவோ விற்க்கவோ முடியாது. ஆனால் தற்போது அந்தத் சட்டத்தை மாற்றி அங்கு யார் வேண்டுமானாலும் இடத்தை வாங்களாம் விற்க்கலாம் என்று பிரபுல் கோடாவை வைத்து சட்டத்திருத்தம் கொண்டுவந்துள்ளது இந்திய மோடி அரசு.

 

சுற்றுலாத்துறையை நம்பி வாழும் லட்டத்தீவு மக்களின் வாழ்வில் பெருத்த இடியாக வீழ்ந்துள்ளது இந்த அறிவிப்பு.

 

லட்சத்தீவுகளின் பெரும்பான்மையாக வாழ்வோர் முஸ்லிம்கள் என்ற வகையில் அங்குள்ளவர்களின் பிரதான உணவாக மாட்டிரைச்சி இருக்கிறது. தற்போது மோடி அரசு கொண்டுவந்துள்ள புதிய சட்டத்திருத்தத்தின் பிரகாரம் லட்சத்தீவுகளில் மாட்டிரைச்சி உண்பதற்கு தடை விதிக்கப்பட்டுள்ளது.

 

ஆனால் இதுவரை காலம் அங்கு அனுமதிக்கப்படாமல் இருந்த சாராயத்திற்கு தற்போது அனுமதி வழங்கப்பட்டுள்ளது.

 

நாட்டை நாசமாக்கும் சாராயத்திற்கு அனுமதி வழங்கி மக்களின் பிரதான உணவாக இருக்கும் மாட்டிரைச்சிக்கு தடை விதித்து முஸ்லிம்களின் உண்ணும் உரிமையில் கைவைத்தது மாத்திரமன்றி மாபெரும் கலாசார சீரழிவுக்கும் வழியேற்படுத்தியுள்ளது மோடியின் இந்த புதிய சட்டத்திருத்தம்.

 

இன்னுமொரு முக்கியமான விஷயம் என்னவென்றால் கடந்த 2019ம் ஆண்டு வரையிலான கணக்கெடுப்பின்படி லட்சத்தீவுகளில் ஒரேயொரு கொலை அல்லது கொள்ளை வழக்குக் கூட பதிவு செய்யப்படவில்லை என்கிறது லட்சத்தீவு தொடர்பான தரவுகள்.

 

இந்த நிலையில் லட்சத்தீவுகளில் குண்டர் தடுப்புச் சட்டத்தை, புதிய சட்டத்திருத்தம் மூலம் கொண்டுவந்துள்ளது மோடி அரசாங்கம்.

 

எந்தவிதமான குற்றமும் நடைபெறாத ஒரு பிரதேசத்தில் ஏன் குண்டர் தடுப்புச் சட்டம் கொண்டுவரப்பட்டுள்ளது என அங்குள்ள மக்கள் கேள்வியெழுப்புகிறார்கள்.

 

பொதுவாக முஸ்லிம்கள் அதிக குழந்தை பெருவதில் ஆர்வம் கொண்டவர்கள். இஸ்லாமும் அதனை வரவேற்கிறது. குறிப்பாக குழந்தை என்பதே இறைவனின் மிகப்பெரும் அருளாகும். குழந்தையில்லாமல் வாழ்நாள் முழுவதும் கண்ணீருடன் வாழும் குடும்பங்களுக்குத்தான் குழந்தையின் அருமை தெரியும் என்பார்கள். இஸ்லாம் குடும்ப வாழ்வை மிக சீரான வழிகாட்டல்களுடன் முன்மொழிந்துள்ளதினால் முஸ்லிம்கள் குடும்ப வாழ்வில் பின்னிப் பினைந்தவர்களாக இருக்கிறார்கள்.

 

லட்சத்தீவுகளில் முஸ்லிம்களுக்கு எதிராக மோடி அரசாங்கம்  கொண்டுவந்துள்ள சட்டத்திருத்தத்தில் இன்னுமொரு முக்கியமான திருத்தம் என்னவென்றால் 2 குழந்தைகளுக்கு மேல் பெற்றுக்கொள்ளும் எவறும் மாவட்ட பஞ்சாயத்து தேர்தலில் போட்டியிடுவதற்கு தடை விதிக்கப்பட்டுள்ளது.

 

இதன் மூலம் முஸ்லிம்களின் மக்கள் தொகையை குறைக்கும் மிகப்பெரும் சூழ்ச்சியை அரங்கேற்ற முயல்வதுடன் உள்ளாட்சி மன்ற பஞ்சாயத்து பொறுப்புகளிலிருந்து பெரும்பான்மையான முஸ்லிம்களை ஓரங்கட்டும் திட்டத்தையும் மோடி அரசு நுழைவிக்கிறது.

 

மோடியின் அரசினால் நியமிக்கப்பட்டுள்ள புதிய நிர்வாக பிரபுல் கோடா பொறுப்பை ஏற்றுக் கொள்வதற்கு முன்பதாக லட்சத்தீவுகளில் எவ்விதமான கொரோனா தாக்கங்களும் இருக்கவில்லை. குறிப்பாக இந்தியாவில் மிகப்பெரும் தாக்கத்தை உண்டாக்கிய கொரோனா முதல் அலையின் போது இங்கு எந்தவொரு கொரோனா நோயாளியும் கண்டறியப்படவில்லை.

 

ஆனால், நிர்வாகப் பொறுப்பை கையில் எடுத்த ஒரு சில வாரங்களிலேயே அங்குள்ள கொரோனா விதிகளை தளர்தினார் மோடியின் நிர்வாக பிரபுல் கோடா. இதனால் கொரோனா தொற்று வேகமாக லட்சத்தீவுகளில் பரவ ஆரம்பித்தது. தற்போது வரை சுமார் 6 ஆயிரம் பேர் கொரோனா தொற்றினால் அங்கு பாதிக்கப்பட்டுள்ளதாக தரவுகள் குறிப்பிடுகின்றன.

 

முஸ்லிம்கள் எந்த மூலையில் இருந்தாலும் அவர்களின் நிம்மதியை கெடுத்து அவர்களின் வாழ்வாதாரத்தை இல்லாமல் செய்து அதன் மூலம் ஆட்சியை தக்கவைத்துக் கொள்ள இனவாதமும் மதவாதமும் பேசி வரும் இந்திய மத்திய அரசின் மோடி வகையராக்களின் லட்சத்தீவுகள் அபகரிப்பு தொடர்பில் ஜனநாயவாதிகள் பலரும் எதிர்ப்புகளை வெளியிட்டு வருகின்றார்கள்.

 


கேரளாவின் ஆளும் அரசு சார்பில் லட்சத்தீவுகளுக்கு நியமிக்கப்பட்ட மோடியில் நிர்வாகி பிரபுல் கோடாவை அப்பொறுப்பிலிருந்து அகற்ற வேண்டும் என கேரள முதல்வர் சட்ட சபையில் தீர்மானமொன்றையும் கொண்டு வந்துள்ளார்.

 

இதே வேலை லட்சத்தீவுகளில் இருக்கும் தென்னை மரங்களுக்குக் கூட மோடி அரசு காவி நிரம் பூசியுள்ளதாகவும் லட்சத்தீவுகளையும் காவி மயமாக்கும் ஒரு திட்டம் தான் இதுவென்றும் தமிழ்நாடு முஸ்லிம் முன்னேற்றக் கழக தலைவரும், தமிழ்நாடு சட்டமன்ற உறுப்பினருமான பேராசிரியர் ஜவாஹிருல்லாஹ் தனது கண்டன அறிக்கையில் தெரிவித்துள்ளார்.

 

லட்சத்தீவுகளின் ஜனநாயகம் காக்கப்பட்டு, அங்கு வாழும் மக்கள் இதுவரை காலமும் வாழ்ந்ததை போல் எவ்வித சங்கடங்களும் இன்றி நிம்மதியாக வாழ வேண்டும் என்பதே நல்லுள்ளம் கொண்ட அனைவரினதும் பிராத்தனையும் விருப்பமுமாகும்.

 

ஜனநாயகம் வெற்றியடையும் போது இனவாதம் தோற்று மண்ணைக் கவ்வும் என்பதில் சந்தேகமில்லை.

June 1, 2021

பராஅத் இரவு எனும் பெயரில் நடக்கும் கொண்டாட்டங்களுக்கும், வழிபாடுகளுக்கும் இஸ்லாத்திற்கும் எவ்வித தொடர்பும் இல்லை.


 
ஷஃபான் 15 இல் நோன்பு நோற்பதற்கு ஆதாரபூர்வமான நபிமொழிகளில் எவ்வித வழிகாட்டல்களும் கிடையாது.



ஷஅபான் மாதம் பதினைந்தாம் இரவை ஷபே பராஅத் என்ற பெயரில் சிறப்புமிக்க இரவாகக் கருதி அந்த இரவு முழுவதும் விழித்து நோன்பு நோற்று பல விதமான வணக்கங்களைச் சிலர் செய்து வருகிறார்கள்.

இந்த இரவு சிறப்புமிக்க இரவு என்பதற்கு கீழே நாம் எடுத்துக்காட்டும் செய்திகளை ஆதாரங்களாக எடுத்துக் காட்டுகின்றனர்.

முதல் ஆதாரம்

தெளிவான இவ்வேதத்தின் மீது சத்தியமாக! இதை பாக்கியம் நிறைந்த இரவில் நாம் அருளினோம். நாம் எச்சரிக்கை செய்வோராவோம். அதில் தான் உறுதியான காரியங்கள் யாவும் பிரிக்கப்படுகின்றன.

திருக்குர்ஆன் 44:2-4

இவ்வசனத்தில் கூறப்பட்டுள்ள பாக்கியமுள்ள இரவு பராஅத் இரவு தான் என்பது இவர்களின் முதல் ஆதாரமாகும்.

பாக்கியமுள்ள இரவு என்று அல்லாஹ் ஒரு இரவைக் குறிப்பிட்டால் நிச்சயம் அது பாக்கியமிக்கது தான். அதில் எந்தச் சந்தேகமும் இல்லை.

ஆனால் பாக்கியமிக்க இரவு என்பது ஷஅபான் மாதத்தின் 15 ஆம் இரவு என்பதற்கு எந்த ஆதாரமும் இல்லை.

பாக்கியமிக்க இரவு என்று அல்லாஹ் கூறும் போது அதற்கான காரணத்தையும் சேர்த்தே சொல்கிறான்.

இந்த இரவில் திருக்குர்ஆனை நாம் இறக்கினோம் என்பது தான் அந்தக் காரணமாகும்.

எந்த இரவில் குர்ஆன் அருளப்பட்டதோ அந்த இரவைத் தான் இவ்வசனம் குறிப்பிடுகிறது.

எந்த இரவில் குர்ஆன் அருளப்பட்டது என்பதை நாம் திருக்குர்ஆனில் தேடிப் பார்த்தால் அந்த இரவு ரமலான் மாதத்தில் உள்ள லைலத்துல் கத்ர் இரவு என்று அறிந்து கொள்ளலாம்.

இந்தக் குர்ஆன் ரமளான் மாதத்தில் தான் அருளப்பட்டது. (அது) மனிதர்களுக்கு நேர்வழி காட்டும். நேர்வழியைத் தெளிவாகக் கூறும். (பொய்யை விட்டு உண்மையை) பிரித்துக் காட்டும். உங்களில் அம்மாதத்தை அடைபவர் அதில் நோன்பு நோற்கட்டும்.

திருக்குர்ஆன் 2:185

மகத்துவமிக்க இரவில் இதை நாம் அருளினோம்.

திருக்குர்ஆன் 97:1

அந்த இரவு ரமலான் மாதத்தில் உள்ள லைலத்துல் கத்ர் இரவு தான் என்று இவ்வசனங்கள் மூலம் அல்லாஹ் விளக்கம் கொடுத்து விட்டான்.

பாக்கியமிக்க இரவு என்பது ரமலான் மாதத்தில் உள்ள லைத்துல் கத்ரைத் தான் குறிக்கிறதே தவிர ஷஅபான் மாதத்தின் 15 ஆம் இரவு அல்ல என்பது மிகத் தெளிவாகத் தெரிகின்றது. எனவே பராஅத் இரவுக்கும் இவர்கள் காட்டும் வசனத்திற்கும் எந்தச் சம்பந்தமுமில்லை.

இரண்டாம் ஆதாரம்

حدثنا الحسن بن علي الخلال حدثنا عبد الرزاق أنبأنا ابن أبي سبرة عن إبراهيم بن محمد عن معاوية بن عبد الله بن جعفر عن أبيه عن علي بن أبي طالب قال قال رسول الله صلى الله عليه وسلم إذا كانت ليلة النصف من شعبان فقوموا ليلهاوصوموا نهارها فإن الله ينزل فيها لغروب الشمس إلى سماء الدنيا فيقول ألا من مستغفر لي فأغفر له ألا مسترزق فأرزقه ألا مبتلى فأعافيه ألا كذا ألا كذا حتى يطلع الفجر – ابن ماجة 1378


ஷஅபான் மாதத்தில் பாதி இரவு வந்து விட்டால் அதில் நீங்கள் நின்று வணங்குங்கள். அந்தப் பகலில் நோன்பு பிடியுங்கள். அந்த இரவில் இறைவன் வானத்திலிருந்து இறங்கி வந்து, பாவமன்னிப்புத் தேடுவோர் உண்டா? நான் அவர்களின் பாவங்களை மன்னிக்கிறேன். சோதனைக்கு ஆளானோர் உண்டா? நான் அவர்களின் துன்பங்களைப் போக்குகின்றேன். என்னிடம் உணவு கேட்பவர் உண்டா? நான் அவர்களுக்கு உணவளிக்கிறேன் என்று காலை வரை கூறிக் கொண்டேயிருக்கிறான் என நபிகள் நாயகம் (ஸல்) அவர்கள் கூறினார்கள்.

அறிவிப்பவர் : அலீ (ரலி)

நூல் : இப்னுமாஜா 1378

இப்னுமாஜாவில் பதிவு செய்யப்பட்டுள்ள இந்தச் செய்தி ஆதாரப்பூர்வமான செய்தி அல்ல.

இப்னு அபீ ஸப்ரா என்பவர் வழியாக இச்செய்தி அறிவிக்கப்பட்டுள்ளது. இவரது இயற்பெயர் அபூபக்ர் பின் அப்துல்லாஹ் பின் முஹம்மது அபீ புஸ்ரா” ஆகும்.

موسوعة أقوال الإمام أحمد بن حنبل في رجال الحديث وعلله


قال عبد الله بن أحمد: سمعتُ أَبي يقول: أبو بكر بن أبي سبرة كان يضع الحديث، ثم قال: قال حجاج: قال لي أبو بكر السبري: عندي سبعون ألف حديث في الحلال والحرام. قال أبي: وليس حديثه بشيء، كان يكذب ويضع الحديث.


இப்னு அபீ ஸப்ரா என்பவர் ஹதீஸ்கள் என்ற பெயரால் இட்டுக்கட்டிக் கூறுபவர் என அஹ்மத் பின் ஹம்பல் அவர்கள் கூறியுள்ளார்கள்.

ت أبو بكر بن عبد الله ق بن أبي سبرة المدني القاضي الفقيه عن الأعرج وعطاء بن أبي رباح وعنه عبد الرزاق وأبو عاصم و جماعة ضعفه البخاري و غيره وروى عبد الله وصالح ابنا أحمد عن أبيهما قال كان يضع الحديث

ميزان الإعتدال في نقد الرجال

இப்னு அபீ ஸப்ரா என்பவர் பலவீனமனவர் என்று புகாரி அவர்களும், ஹதீஸ்களை கட்டுக்கட்டிச் சொல்பவர் என்று அஹ்மத் பின் ஹம்பல் அவர்களும் கூறியுள்ளனர்.

666 أبو بكر بن عبد الله بن أبي سبرة متروك الحديث (الضعفاء والمتروكين للنسائي

அபூபக்ர் என்பார் பலவீனமானவர் என்று நஸாயி அவர்கள் அல்லுஅஃபாஉ வல் வல்மத்ருகீன் என்ற நூலில் குறிப்பிட்டுள்ளார்.

மூன்றாம் ஆதாரம்

سنن الترمذي

739 – حَدَّثَنَا أَحْمَدُ بْنُ مَنِيعٍ قَالَ: حَدَّثَنَا يَزِيدُ بْنُ هَارُونَ قَالَ: أَخْبَرَنَا الحَجَّاجُ بْنُ أَرْطَاةَ، عَنْ يَحْيَى بْنِ أَبِي كَثِيرٍ، عَنْ عُرْوَةَ، عَنْ عَائِشَةَ قَالَتْ: فَقَدْتُ رَسُولَ اللَّهِ صَلَّى اللَّهُ عَلَيْهِ وَسَلَّمَ لَيْلَةً فَخَرَجْتُ، فَإِذَا هُوَ بِالبَقِيعِ، فَقَالَ: «أَكُنْتِ تَخَافِينَ أَنْ يَحِيفَ اللَّهُ عَلَيْكِ وَرَسُولُهُ»، قُلْتُ: يَا رَسُولَ اللَّهِ، إِنِّي ظَنَنْتُ أَنَّكَ أَتَيْتَ بَعْضَ نِسَائِكَ، فَقَالَ: «إِنَّ اللَّهَ عَزَّ وَجَلَّ يَنْزِلُ لَيْلَةَ النِّصْفِ مِنْ شَعْبَانَ إِلَى السَّمَاءِ الدُّنْيَا، فَيَغْفِرُ لِأَكْثَرَ مِنْ عَدَدِ شَعْرِ غَنَمِ كَلْبٍ» وَفِي البَابِ عَنْ أَبِي بَكرٍ الصِّدِّيقِ.: «حَدِيثُ عَائِشَةَ لَا نَعْرِفُهُ إِلَّا مِنْ هَذَا الوَجْهِ مِنْ حَدِيثِ الحَجَّاجِ»،

وَسَمِعْتُ مُحَمَّدًا يُضَعِّفُ هَذَا الحَدِيثَ، وقَالَ: يَحْيَى بْنُ أَبِي كَثِيرٍ لَمْ يَسْمَعْ مِنْ عُرْوَةَ، وَالحَجَّاجُ بْنُ أَرْطَاةَ لَمْ يَسْمَعْ مِنْ يَحْيَى بْنِ أَبِي كَثِيرٍ “

அன்னை ஆயிஷா (ரலி) அவர்கள் ஒரு நாள் இரவு, படுக்கையில் நபிகள் நாயகம் (ஸல்) அவர்களைக் காணாமல் வெளியே தேடி வந்தார்கள். அப்போது அவர்கள் பகீவு என்ற இடத்தில் நின்று கொண்டிருந்தார்கள். ஷஅபான் மாதம் 15 ஆம் இரவில் அல்லாஹ் முதல் வானத்திற்கு இறங்கி கலப் கோத்திரத்தாரின் ஆட்டு ரோமத்தின் எண்ணிக்கை அளவுக்கு (பாவங்களை) மன்னிக்கின்றான் என்று அப்போது நபிகள் நாயகம் (ஸல்) அவர்கள் கூறினார்கள்.

அறிவிப்பவர் : ஆயிஷா (ரலி)

நூல்: திர்மிதி

இந்த ஹதீஸ் ஆதாரப்பூர்வமானது அல்ல என்பதை இதைப் பதிவு செய்த திர்மிதீ அவர்களே விளக்கியுள்ளார்கள்.

இதன் அறிவிப்பாளர்களில் ஒருவரான யஹ்யா பின் அபீ கஸீர் என்பார் உர்வா என்பார் வழியாக அறிவிப்பதாக இதில் கூறப்பட்டுள்ளது. ஆனால் யாஹ்யா பின் அபீ கஸீர் என்பார் உர்வாவிடம் எதையும் செவியுற்றதில்லை என்று புகாரி கூறுகிறார். மேலும் ஹஜ்ஜாஜ் பின் அர்தாத் என்பார் இதை யஹ்யா பின் அபீ கஸீர் வழியாக அறிவிப்பதாக இதில் கூறப்பட்டுள்ளது. ஆனால் ஹஜ்ஜாஜ் என்பார் யஹ்யா பின் அபீ கஸீரிடம் எதையும் செவியுறவில்லை. எனவே இது பலவீனமான ஹதீஸ் என்று புகாரி கூறுகிறார். இந்த விபரத்தை இந்த ஹதீஸின் இறுதியில் திர்மிதி அவர்களே குறிப்பிட்டுள்ளார்கள்.

எனவே இதையும் ஆதாரமாகக் கொள்ள முடியாது.

நான்காவது ஆதாரம்

مصنف ابن أبي شيبة

9764 – حَدَّثَنَا يَزِيدُ، قَالَ: أَخْبَرَنَا الْمَسْعُودِيُّ، عَنِ الْمُهَاجِرِ أَبِي الْحَسَنِ، عَنْ عَطَاءِ بْنِ يَسَارٍ، قَالَ: «لَمْ يَكُنْ رَسُولُ اللَّهِ صَلَّى اللهُ عَلَيْهِ وَسَلَّمَ فِي شَهْرٍ أَكْثَرَ صِيَامًا مِنْهُ فِي شَعْبَانَ وَذَلِكَ أَنَّهُ تُنْسَخُ فِيهِ آجَالُ مَنْ يَمُوتُ فِي السَّنَةِ

நபிகள் நாயகம் (ஸல்) அவர்கள் ஷஅபான் மாதத்தில் அதிக நோன்பு நோற்பதைப் போல் வேறு எந்த மாதத்திலும் நோற்பவர்களாக இருக்கவில்லை. அந்த ஆண்டு மரணிக்க உள்ளவர்களின் தவணை அம்மாதத்தில் மாற்றப்படுகிறது என்பதே இதற்குக் காரணம்.

அறிவிப்பாளர்: அதாவு பின் யஸார்

நூல்கள்: முஸன்னப் இப்னு அபீஷைபா

இதை அறிவிக்கும் அதாவு பின் யஸார் என்பவர் நபிகள் நாயகம் (ஸல்) அவர்களின் காலத்தைச் சேர்ந்தவர் அல்ல. அதாவது நபித்தோழர் அல்ல. நபிகள் நாயகம் (ஸல்) அவர்கள் தொடர்பான எந்தச் செய்தியாக இருந்தாலும் அதன் முதல் அறிவிப்பாளராக நபித்தோழர் தான் இருக்க வேண்டும். நபித்தோழர் அல்லாதவர் அறிவித்தால் அது பலவீனமான ஹதீஸாகும்.

ஐந்தாவது ஆதாரம்

فضائل رمضان لابن أبي الدنيا

9 – أَخْبَرَنَا ابْنُ إِدْرِيسَ، عَنْ أَبِي الْحَسَنِ الْحُسَيْنِيِّ، عَنْ مُحَمَّدٍ الْعَرْزَمِيِّ، عَنْ مُحَمَّدِ بْنِ عَلِيٍّ، رَفَعَهُ قَالَ: «مَنْ صَلَّى لَيْلَةَ النِّصْفِ مِنْ رَمَضَانَ، وَلَيْلَةَ النِّصْفِ مِنْ شَعْبَانَ مِائَةَ رَكْعَةٍ يَقْرَأُ فِيهَا بِقُلْ هُوَ اللَّهُ أَحَدٌ أَلْفَ مَرَّةٍ، لَمْ يَمُتْ حَتَّى يُبَشَّرَ بِالْجَنَّةِ

ரமலான் மாதம் நடுப்பகுதி 15ஆம் இரவிலும், ஷஅபான் மாதம் நடுப்பகுதி 15ஆம் இரவிலும் இக்லாஸ் எனும் அத்தியாயத்தை 1000 தடவை ஓதி எவர் 100 ரக்அத்கள் தொழுகின்றாரோ அவருக்கு சொர்க்கத்தைக் கொண்டு நற்செய்தி சொல்லப்படும் வரை அவர் மரணிக்க மாட்டார் என்று நபிகள் நாயகம் (ஸல்) அவர்கள் கூறினார்கள்.

அறிவிப்பவர் : முஹம்மத் பின் அலீ

நூல் : ஃபலாயிலு ரமலான்- இப்னு அபித் துன்யா

முஹம்மத் பின்அலீ என்பவர் நபிகள் நாயகம் (ஸல்) அவர்களின் காலத்தில் வாழ்ந்தவர் அல்ல. எனவே இச்செய்தியும் பலவீனமான செய்தியாகும்.

எனவே பராஅத் இரவு குறித்து எந்த ஆதாரப்பூர்வமான செய்தியும் இல்லை.

மேலும் இந்த இரவில் மூன்று தடவை யாஸீன் அத்தியாயம் ஓத வேண்டும்; முதல் யாஸீன் பாவமன்னிப்பிற்காகவும், இரண்டாவது யாஸீன் மரணித்தவர்களுக்கு நன்மை சேர்க்கவும், மூன்றாவது யாஸீன் நீண்ட ஆயுளுக்காகவும் என்று ஓதுகின்றனர்.

இப்படி ஓத வேண்டும் என்று நபிகள் நாயகம் (ஸல்) அவர்கள் கூறவில்லை. இது போலி ஆலிம்கள் வீடுகளுக்குப் போய் சம்பாதிப்பதற்காக உருவாக்கிய பொய் வணக்கமாகும்.

ஷஅபான் மாதம் 15 ஆம் இரவில் நோன்பு நோற்பதும் பித்அத்தாகும்.

صحيح البخاري

2697 – حَدَّثَنَا يَعْقُوبُ، حَدَّثَنَا إِبْرَاهِيمُ بْنُ سَعْدٍ، عَنْ أَبِيهِ، عَنِ القَاسِمِ بْنِ مُحَمَّدٍ، عَنْ عَائِشَةَ رَضِيَ اللَّهُ عَنْهَا، قَالَتْ: قَالَ رَسُولُ اللَّهِ صَلَّى اللهُ عَلَيْهِ وَسَلَّمَ: «مَنْ أَحْدَثَ فِي أَمْرِنَا هَذَا مَا لَيْسَ فِيهِ، فَهُوَ رَدٌّ»

நமது மார்க்கத்தில் ஒருவர் புதிதாக ஒன்றை உருவாக்கினால் அது ரத்து செய்யப்படும் என்று நபிகள் நாயகம் (ஸல்) அவர்கள் கூறினார்கள்.

அறிவிப்பவர் : ஆயிஷா (ரலி)

நூல் : புகாரி 2697

صحيح مسلم

4590 – وَحَدَّثَنَا إِسْحَاقُ بْنُ إِبْرَاهِيمَ وَعَبْدُ بْنُ حُمَيْدٍ جَمِيعًا عَنْ أَبِى عَامِرٍ قَالَ عَبْدٌ حَدَّثَنَا عَبْدُ الْمَلِكِ بْنُ عَمْرٍو حَدَّثَنَا عَبْدُ اللَّهِ بْنُ جَعْفَرٍ الزُّهْرِىُّ عَنْ سَعْدِ بْنِ إِبْرَاهِيمَ قَالَ سَأَلْتُ الْقَاسِمَ بْنَ مُحَمَّدٍ عَنْ رَجُلٍ لَهُ ثَلاَثَةُ مَسَاكِنَ فَأَوْصَى بِثُلُثِ كُلِّ مَسْكَنٍ مِنْهَا قَالَ يُجْمَعُ ذَلِكَ كُلُّهُ فِى مَسْكَنٍ وَاحِدٍ ثُمَّ قَالَ أَخْبَرَتْنِى عَائِشَةُ أَنَّ رَسُولَ اللَّهِ -صلى الله عليه وسلم- قَالَ « مَنْ عَمِلَ عَمَلاً لَيْسَ عَلَيْهِ أَمْرُنَا فَهُوَ رَدٌّ ».

நமது அனுமதியில்லாமல் ஒரு அமலைச் செய்தால் அது நிராகரிக்கப்படும் என்று நபிகள் நாயகம் (ஸல்) அவர்கள் கூறினார்கள்.

அறிவிப்பவர் : ஆயிஷா (ரலி)

நூல் : முஸ்லிம்

நபிகள் நாயகம் (ஸல்) அவர்களின் இந்த எச்சரிக்கைக்கு மதிப்பளித்து பிற்காலத்தில் உருவாக்கப்பட்ட பராஅத் வணக்கங்களை விட்டொழிப்போமாக!